أسرار لن يخبرك بها الميكانيكي عن سيارتك … تعرف عليها

يتعرض العديد من مالكي السيارات للاستغلال من قبل الفنيين عن طريق تهويل مشاكل
بسيطة جدا وتلاقي نفسك بتدفع مبالغ كبيرة علي الأرض عشان كده في حلقتنا الجديدة
هنقدملك أسرار لن يخبرك بها الميكانيكي بحيث متديش فرصة لحد يستغلك تابعونا
للأشتراك في قناة أسرار TV اضغط هنا
لمعرفة أكثر الأخطاء الشائعة التي تدمر الفتيس اضغط هنا

أسرار لن يخبرك بها الميكانيكي:

أول سر

أول حاجة في الـ Dash Board لو لقيت اشارات تحذيرية لفحص المحرك
(Check Engine) ونظام الـ ABS ونظام التراكشن كنترول TCS منورة وأنت سايق
في أغلب الحالات المشكلة بتكون من السوفت وير وبعيدة عن مشكلة في أجزاء السيارة
خصوصا في السيارات الحديثة عشان الصورة توضح أكتر لو عندك مشكلة في المحرك
وظهرت اشارة الـ Check Engine هيتسبب في وقف أنظمة الـ ABS والتراكشن كنترول
وده من السوفت وير بس لكن مفيش أي مشكلة في الأجزاء وبمجرد ما تعمل فحص للمحرك
وتحل المشكلة دي الأول هتلاقي الأنظمة الباقية يشتغل معاك من غير أي مشاكل أوقات
كتيرة لما  تروح للميكانيكي هيوهمك أنه صلح حاجات كتير في نظام الـ ABS والتراكشن
كنترول مع انه معملش فيهم أي حاجة وتتكلف فلوس علي الفاضي ولو مصلحش مشكلة
المحرك الرئيسية الاشارات دي هتظهرلك تاني عشان كده أول حاجة لازم تعملها هي فحص
المحرك وده هيحل المشاكل كلها

تاني سر

تاني حاجة اشارة الصيانة في التابلوه أو الـ Maint REQD  ودي لو ظهرت لوحدها من
غير ما يبقي معاها اي تحذيرات تانية هدفها الرئيسي أنها تخوفك مش أكتر عشان تجري
بالعربية علي التوكيل وتعمل صيانة حتي لو مفيش مشاكل في أغلب الأحيان بتظهر بعد
ما تمشي عدد كيلوهات معين لو أنت واخد بالك من العربية كويس وبتغير الزيت باستمرار
والعربية مفيهاش مشاكل مفيش داعي توديها التوكيل لأن كل اللي هيعمله أنه هيقفل اشارة
الصيانة في التابلوه وهياخد منك فلوس أنت ممكن تقفل اللمبة دي بنفسك وتريح دماغك
طالما العربية شغالة كويس وبنكرر تاني أهم حاجة تغير الزيت باستمرار

تالت سر

تالت حاجة متضيعش فلوسك علي Additives غالية ودي بتكون اضافات بتحطها في
تانك البنزين أو المحرك أو الفتيس وطبعا الشركات بتعمل كل حاجة تقدر عليها
عشان تبيع المنتجات دي الحقيقة أن الاضافات دي هتنفع شوية لو عربيتك قديمة أوي
وبتحرق زيت بسرعة مثلا أو عايز تحسن كفائتها لكن لو عربيتك جديدة الـ Additives
ملهاش أي فايدة وهترمي فلوسك علي الأرض البنزين مثلا مش محتاج اي اضافات
تحطها معاه في التانك عشان تحسن جودته لأنه بيبقي معاه اضافات من شركات البترول
اساسا نفس الكلام بالنسبة للزيت هتلاقي الميكانيكي بيقولك اشتري الـ Additive دي
وحطها مع الزيت عشان ميتحرقش بسرعة أو يقعد معاك فترة طويلة ومتحتجش تغيره
كل ده كلام دعاية وتغيير الزيت باستمرار ده شئ أساسي عشان تحافظ علي المحرك مش
تشتري اضافات وتحطها علي الزيت القديم

رابع سر

رابع حاجة  لو المكيف الساخن (Heater) مش شغال معاك كويس ولقيت الهوا مش سخن
بالدرجة الكافية أو المكيف مش شغال من أساسه ده غالبا بيبقي بسبب حاجة بسيطة أوي
وهي أن مستوي مياه التبريد أو الـ coolant منخفضة عشان كده أهم حاجة تتأكد من
مستوي مياه التبريد بدل ما تودي العربية لحد ويوهمك أن التكييف بايظ ومحتاج يتصلح

خامس سر

خامس حاجة وأنت بتشتري بطارية جديدة للعربية، البطاريات في السوق حاليا بيتم تعبئتها
بالـ Acid في المصانع مسبقا يعني مش هتحتاج تملاها Acid بنفسك لما تشتريها طيب ايه
المشكلة في كده؟ كل ما يعدي وقت علي البطارية وهي مليانة أسيد من غير استخدام عمرها
الافتراضي بيقل وبتتلف يعني لو اشتريت بطارية متخزنة بقالها شهور (سواء مشتريها من
بلد تانية أو كانت بطارية مركونة عند الشخص اللي بتشتري منه) هتلاقي البطارية بالكتير
بتشتغل معاك كام شهر ولا سنة وتبوظ 

طبعا الشخص اللي بيبيع مش هينبهك للموضوع ده وهيقولك أن البطارية جديدة ومحدش
استخدمها قبلك بحيث أن دي أكتر حاجة بتهم الناس عشان كده متخليش حد يستغلك لو
بتشتري بطارية جديدة بص علي تاريخ صنع البطارية واشتري بطارية يكون تاريخ صنعها
أقل من شهر لأنها مش هتلحق تتلف في شهر لكن بلاش تروح بقي لمخازن ومحلات عندهم
اهرامات بطاريات بقالها شهور مركونة حتي لو كانت بنص التمن لأنها مش هتكمل معاك

وبكده احنا قولنالك 5 أسرار تقدر من خلالهم تحافظ علي فلوسك ومحدش بعد كده هيقدر يستغلك