in ,

أنواع فتيس السيارة مع مميزات وعيوب كل فتيس وطرق المحافظة

أنواع فتيس السيارة

أنواع فتيس السيارة

أنواع فتيس السيارة متعددة الأمر اللي ممكن يصيبك بالحيرة عشان كده النهاردة معانا قائمة
بجميع أنواع الفتيس مع مميزات وعيوب كل واحد وطرق المحافظة عليه تابعونا

أنواع فتيس السيارة

الفتيس المانيوال

أنواع فتيس السيارة

وده الفتيس اليدوى اللى كلنا عارفينه يعتمد على تحريك عصا الفتيس مع الضغط علي
الدبرياج عشان تغير في عزم وسرعة العربية وبالنسبة للنقلات الأول بيبقي من بداية
طلعة العربية لحد سرعة 20 كم/ساعة والتاني من 20 لحد 40 والتالت من 40 لحد 60
والرابع يوصل معاك لحد 80 والخامس للسرعات الأعلي 

نصائح عند استخدام الفتيس المانيوال

في أخطاء بيعملها المبتدئين أولهم هو أنك تبقي ماشي علي الخامس وتنزل للتاني مرة
واحدة وده ممكن يخلي العربية تتقلب بيك أنت ممكن تنزل من الخامس لو سرعتك أقل من
100 للتالت لو مضطر لكن الأفضل أنك لو عايز تقلل السرعة يبقى تقلل النقلات بالتدريج
الخامس بعد كده الرابع وهكذا طيب ايه الخطأ الثاني؟ أنك تحمل على النقلة سرعة أكبر
من النسب اللي قولناها التالت مثلا ممكن تمشي بيه على 80
بس كده أنت بتضغط علي الموتور

المميزات

الفتيس المانيوال اعطاله قليله جدا وبيتميز بالعمر الطويل واقتصادي جدا في استهلاك الوقود

الفتيس الأوتوماتيك التقليدي

أنواع فتيس السيارة

الفتيس الأوتوماتيك سهل جدا في التعامل معاه و الأوامر اللي فيه بسيطة D أو Drive
وده للقيادة وبتتحكم في السرعة من خلال ضغطة رجلك علي دواسة البنزين ومفيش دواسة
دبرياج أو نقلات مختلفة للسرعة زي المانيوال الـ P أو الـ Parking وده للركنة وR
أو Reverse لو عايز ترجع بالعربية للخلف وأخيرا ال N وده وضع الحياد تستخدمه
لو واقف في اشارة ا و هتقف بالعربية فترة قصيرة 

العيوب

لكنه لا يخلو من العيوب عمره أقصر من المانيوال وتكلفة إصلاحه عالية وغير اقتصادي
في استهلاك الوقود

نصائح للحفاظ علي الفتيس الأوتوماتيك

  • بلاش تسيب الفتيس على وضع الـ D في الإشارات أو أثناء الانتظار لفترة طويلة
    لأن ده بيسبب Overheat أو زيادة درجة الحرارة داخل الفتيس وده بيقلل العمر
    الإفتراضي، لو هتقف بالعربية فترة اختار وضع الـ P أو الركن
  • بلاش تنقل من الـ D للـ R علي طول أو العكس وقف العربية الأول قبل ما تنقل بينهم
  • واخيرا حاول تتجنب الكيك داون لأنه من الأسباب الشائعة لتقليل عمر الفتيس

 أنواع فتيس السيارة الاوتوماتيك

الفتيس الستيب ترونيك

أنواع فتيس السيارة

ده فتيس من تطوير شركة بورش الألمانية بيجمع بين مميزات المانيوال والأوتوماتيك
بحيث تقدر تستخدم نظام التتبع التلقائي للسرعات أو تستخدم النظام اليدوي بيكون مزود
بأوضاع الـ D للقيادة والـ P للركن والـ N والـ R وتقدر تتحكم في النقلات المانيوال
من خلال علامة الـ + أو – بالقرب من علامة الـ D بدون الحاجة لتحريك عصا الفتيس
في اتجاهات محددة لإدخال التروس في المجرى المخصص لكل سرعة وهيظهرلك
رقم النقلة في الشاشة الديجيتال في التابلوه

الفتيس الايزي ترونيك

أنواع فتيس السيارة

ده نسخة مطورة من الفتيس المانيوال بيكون فيه علبة تروس عادية ودبرياج الاختلاف هنا
أن الكمبيوتر هو اللي بيتحكم في الدبرياج مش الدواسة والسرعة بتتغير بطريقة تلقائية
(الكمبيوتر هو اللي متحكم في تغيير السرعة) عن طريق الـ D+ والـ D- بدون الحاجة
لتحريك عصا الفتيس في اتجاهات محددة لإدخال التروس في المجرى المخصص الايزي
ترونيك اكثر سرعة من الستيب ترونيك لأنه بيستخدم نفس بنية الفتيس المانيوال العادي
وبيتم نقل الحركة من خلال الاسطوانة الاحتكاكية ودي كفائتها اعلى كمان الايزي ترونيك
أسرع في النقلات وأكثر مرونة 

الفتيس الـ Dual Clutch

الفتيس الـ Dual Clutch

أي فتيس بيعتمد علي فكرة واحدة وهي النقلات المشكلة أن مابين كل نقلة والتانية بيكون
فيه فترة زمنية أو تهنيج كده لحد ما العربية تستوعب النقلة بيتهدر فيها قوة الموتور
والبنزين ومن هنا بدأت فكرة الفتيس الـ Dual Clutch وده عبارة عن فتيس بـ 2 دبرياج
الأول للنقلات الفردي والتاني للنقلات الزوجي يعني لو أنت علي النقلة الأولي الدبرياج
الزوجي هيكون مجهز النقلة التانية عشان النقلات تبقي سريعة وميبقاش فيه أي ضياع في
الطاقة نفس الكلام في النقلات الباقية كل دبرياج بيسلم للتاني وبيبقي جاهز للنقلة اللي بعدها
الفتيس الـ Dual Clutch بيكون ليه مسميات علي حسب الشركة المصنعة أشهرها
الـ DSG لفولكس فاجن

DSG

الفتيس الـ Dual Clutch ناس كتير بتبعد عنه وبتخاف تشتري أي عربية موجود فيها
وده بسبب أن بعض الشركات في مصر الفتايس دي كان فيها مشاكل خلينا نبتدي بأنواع
الفتيس ونشوف ايه عيوب كل واحد

أول حاجة الفتيس الـ Wet وده مفيهوش أي مشاكل وتبريده كويس جدا

تاني نوع وهو الـ Dry أو الجاف وده كان سبب المشكلة الدول الأوروبية الجو فيها مختلف
عن مصر والدول العربية ومع الظروف القاسية زي الحر والزحمة الفتيس في أجزاء منه
بتتلف وتحتاج تغيرها وتتكلف فلوس وكمان في موديلات كان فيها عيوب في الصناعة وده
أثر بشكل كبير علي سمعة الفتايس الـ Dual Clutch

طبقا لفولكس فاجن الفتايس الـ Dry أصبحت أفضل من الأول وتم تطويرها للتغلب علي
المشاكل السابق ذكرها لكن احنا مش متأكدين هل تم حل المشكلة بالكامل ولا لأ حابين ننوه
بس أن الفتيس الـ DSG الجاف الوحيد في مصر هو DQ200 

قبل ما تشتري أي عربية أسأل علي موديل الفتيس الـ DSG ولو متخوف من أي مشاكل
مستقبلية ابعد عن الـ DQ200 وباقي الموديلات Wet مش هتواجهك معاها أي مشاكل

من الحاجات اللي هتحافظ علي عمر الفتيس الـ Dry طبقا لتعليمات شركة فولكس فاجن
هي أنك تستعمل الأوتوماتيك في الطرق الفاضية وانقل للمانيوال من خلال نظام الستيب
ترونيك في الطرق الزحمة

فتيس CVT – أفضل أنواع فتيس السيارة

فتيس CVT

مشكلة أي عربية أن المحرك بيكون متقيد بعدد لفات معين من 6000 لـ 7000 RPM
بحيث عمرها الافتراضي ميقلش وتشتغل معاك أطول فترة ممكنة ومن هنا بدأت فكرة
الفتيس الـ CVT بحيث يزود سرعة الموتور اللي رايحة لعجل العربية من غير ما يأثر
علي العمر الافتراضي، عشان نفهم طريقة عمله خلينا نبتدي بنموذج مصغر وليكن
ترسين
واحد كبير متوصل بالموتور والتاني أصغر منه متوصل بالعجل هتلاقي أن كل لفة
للترس الكبير بيقابلها لفتين تلاتة من الترس الصغير وبكده السرعة هتزيد طبعا ده نموذج
لكن الحقيقة بيكون فيه عدد كبير من التروس متقسمين لمجموعات 

ممكن تزود بيهم السرعة أو تقللها علي حسب ظروف التشغيل هنشرحها بالتفصيل بس خلينا
نتكلم الأول عن واحد من المصطلحات الهامة اللي لازم تبقي عارفها هي نسب التعشيق
أو الـ Gear Ratio لنفترض مثلا أن عدد لفات الموتور 500 RPM والفتيس زودها
لـ 1000 لفة كده نسبة التعشيق 2 ولو زودها لـ 2000 كده نسبة التعشيق هتبقي 4
(لو عايز تحسب نسبة التعشيق اقسم عدد اللفات اللي واصل للعجل علي عدد لفات المحرك)

طيب احنا ليه بنتكلم عن نسب التعشيق؟ لأن ده الفرق بين الفتيس الـ CVT وأي فتيس تاني.
نسب التعشيق في أي فتيس تاني بتكون ثابتة (النقلة الاولى التانية التالتة وهكذا) لكن بالنسبة
للفتيس الـ CVT بيكون في عدد لا نهائي لنسب التعشيق تخضع لظروف التشغيل وحسب
الحاجة للسرعة ـ الفتيس ال CVT عبارة عن بكرتين واحد متوصل بالموتور والثاني بعجل
العربية
ومربوطين بسير تعالو نتكلم عن ظروف التشغيل أثناء طلعة العربية مثلا أنت مش
محتاج سرعة عالية علي قد ما أنت محتاج لعزم كبير يحرك العربية من السكون هتلاقي
حجم البكرة المتصلة بالموتور بتصغر والبكرة المتصلة بالعجل بتكبر بحيث توصل أكبر
عزم وتخلي العربية تتحرك بمجرد أن العربية تمشي هتلاقي حجم البكرة اللي متصلة
بالموتور بتكبر واللي متوصلة بالعجل بتصغر بحيث تزود سرعة العجل علي حسب حاجتك
تغيير حجم البكرات هنا هو ده نسب التعشيق 

المميزات

  • المحافظة على النطاق الأمثل للسرعة وأفضل عزم
  • توفير استهلاك الوقود
  • البساطة في التركيب وفلة الأعطال
  • التسارع من الثبات سلس جدا

العيوب

  • للأسف تجربة القيادة بتكون مملة لو أنت من محبي تغيير النقلات زي الفتيس
    المانيوال
  • صوت المحرك بيكون مرتفع شوية بسبب سرعة الدوران العالية وبيظهر
    أكتر أثناء التسارع
  • بينما يتميز بقلة الأعطال وانخفاض تكاليف الصيانة لكن تمن التصليح لو حاجة
    باظت بتكون مرتفعة جدا مقارنة بالفتيس الاوتوماتيك

لمعرفة أكثر الأخطاء الشائعة اللي بتدمر الفتيس اضغط هنا

للأشتراك في قناة أسرار TV اضغط هنا

شاهد الفيديو التالي للمزيد عن انواع الفتايس وطرق الحفاظ عليها

Comments

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Loading…

0