جنرال أمريكي يؤكد معلومات الاستخبارات السعودية عن الهجوم الإيراني المحتمل| استسلام امريكا امام روسيا

نوفمبر 10, 2022


هانشوف مع بعض في فيديو انهاردة جنرال أمريكي يؤكد معلومات الاستخبارات السعودية عن الهجوم الإيراني المحتمل.. هل اقتربت نهاية الحرب بعد المحادثات السرية بين أمريكا وروسيا؟ .. والرئيس السيسي يعلن استعداده للتدخل لإنهاء الحرب

قوة المخابرات السعودية

النهاردة بقى في جنرال أمريكي سابق في الجيش الأمريكي اسمه جاك كاين .. عمل لقاء تلفزيوني مع قناة فوكس نيوز .. وأكد على قوة المخابرات السعودية وإنها لما بتقول حاجة يبقى أكيد هتحصل وخصوصا لو إيران كانت موجودة في الموضوع .. وقال كده بالنص ، “أنا أصدق نظام الاستخبارات السعودية الذي يعتبر ممتازًا، وخصوصًا عندما يكون مركزًا على إيران”.. يعني هو عارف قدرات الجهاز الاستخباراتي السعودي كويس وإنه فعلا مش بيقول أي كلام وخلاص .. لأ .. ده كمان شهد له بأنه ممتاز.
الجنرال الأمريكي السابق قال كمان إن أمريكا أكيد كان عندها معلومات باللي عاوز إيران تعمله .. وإسرائيل برده كان عندها معلومات على فكرة .. ولو نفتكر إنه في سنة 2019 الإيرانيين نفذوا هجوم ناجح على حقول نفط سعودية وكانت نسبة نجاحة 67% .. وده اللي بيدعو للقلق من المعلومات الأخيرة .. واللي يخلينا ناخدها على محمل الجد مش الهزار.

كمان قال إن السعودية قدمت المعلومات دي للولايات المتحدة الأمريكية .. علشان إيران ممكن تهاجم مدينة أربيل العراقية ودي فيها قاعدة عسكرية أمريكية .. وكان لازم السعودية تقول لأمريكا إنها تاخد بالها.
طبعا إحنا لازم نفهم من الكلام ده إن المخابرات السعودية لما بتتكلم مش بتتكلم وخلاص .. وإنها مش جهاز مخابرات عادي .. لكنه ممتاز .. وده بشهادة الأمريكان نفسهم. بالمناسبة بردو .. بعد ما إيران نفت استعدادها للهجوم على السعودية .. النهاردة القائد العام للحرس الثوري الإيراني اللواء حسين سلامي .. طلع تاني واتكلم في تصريحات قال فيها إن أعداء إيران وضعوا قواتهم في حالة تأهب .. علشان خايفين من تحرك إيران .. وتوعد بإن الانتقام منهم هيتم هيتم سواء دلوقتي أو بعدين .. يعني كلام المخابرات السعودية كان صح بس إيران طلعت نفت. وقال إن الأعداء عارفين إن إيران هترد عليهم بعد مواقفهم المؤذية ليها على حد كلامه .. لكن مش هينفع نقول الرد هيكون إمتى وإزاي.

ومن السعودية وإيران نروح على الحرب الروسية الأوكرانية اللي باين كده إن نهايتها قربت .. طب إيه الحكاية؟ الحكاية إن في محادثات سرية شغالة بقالها فترة بين أمريكا وروسيا من ناحية .. وأمريكا وأوكرانيا من ناحية تانية .. علشان الصراع الموجود دلوقتي ما يتوسعش وميوصلش لحرب نووية .. ويخلص بالمفاوضات والسلام .. زي ما قالت صحيفة وول ستريت جورنال وصحيفة الواشنطن بوست. صحيفة وول ستريت جورنال قالت إن مستشار الأمن القومي الأمريكي جيك سوليفان وده يعتبر الدراع اليمين للرئيس الأمريكي جو بايدن .. أجرى محادثات سرية مع كبار المسؤولين الروس علشان يقنعهم إنه ميحصلش أي تصعيد للحرب أو لا قدر الله نوصل لحرب نووية .. لكن البيت الأبيض رفض يعلق على الكلام ده بعد نشر التقرير. طبعا الكلام ده جاي في الوقت اللي كان سوليفان في العاصمة الأوكرانية يوم الجمعة اللي فاتت علشان يقابل المسئولين هناك ويؤكد لهم دعم واشنطن الثابت والقوي لأوكرانيا.

عرض المزيد