كيف يجهز محمد بن سلمان السعودية للغد | قمة المناخ وانهاء حرب روسية واكرانيا و الاميرة ريما وتفاصيل

نوفمبر 10, 2022


هانشوف مع بعض في فيديو انهاردة السعودية تقود الشرق الأوسط لمواجهة تغير المناخ .. هل تكون قمة المناخ سببا في إنهاء الحرب الروسية الأوكرانية؟ .. تفاعل كبير على وصف الأميرة ريما بنت بندر لولي العهد السعودي

قمة المناخ في شرم الشيخ

طبعا كلكم متابعين قمة المناخ في شرم الشيخ والزخم الكبير سواء على المستوى الإعلامي أو السياسي العالمي .. علشان الأهمية الكبيرة للقمة دي وتأثيرها على العالم .. وبالتأكيد المملكة العربية السعودية كان لازم يكون لها دور في القمة دي .. لأنها دولة كبيرة إقليميا ودوليا .. وعلشان كده النهاردة الأمير محمد بن سلمان ولي العهد السعودي أعلن في كلمته خلال القمة عن انطلاق النسخة الثانية من مبادرة الشرق الأوسط الأخضر.
وقال إن المملكة هتستضيف مقر المبادرة .. وإن السعودية هتساهم بمبلغ 2.5 مليار دولار كنوع من الدعم لمبادرة الشرق الأوسط الأخضر على مدى الـ10 سنين الجاية .. كمان قال إن المملكة عاوزة تلاقي حلول خلال قمة المناخ لمواجهة التحديات المشتركة بين الدول في قضية التغير المناخي .. لأنها قضية مهمة وخطيرة لازم الدول كلها تتعاون مع بعضها علشان تحلها.
محمد بن سلمان قال بردو إن مبادرة الشرق الأوسط الأخضر هتحاول إنها تخفض الانبعاثات الكربونية في الدول المختلفة .. وإن السعودية مثلا هتشتغل على إنها تولد 50% من الكهرباء عن طريق الاعتماد على مصادر الطاقة المتجددة بحلول سنة 2030 .. وإنه ستتم إزالة 44 مليون طن من الانبعاثات الكربونية بحلول سنة 2035 .. علشان نوصل إلى الحياد الصفري سنة 2050 .. وتكون المملكة من أكتر الدول اللي بتحافظ على المناخ.
نفهم من الكلام ده إن المملكة العربية السعودية حاسة بخطورة تغير المناخ عليها وعلى منطقة الشرق الأوسط والعالم كله .. وعلشان كده أطلقت مبادرة الشرق الأوسط الأخضر .. وخصصت لها 2.5 مليار دولار وده مبلغ مش قليل .. وكلنا لازم نشيد بالخطوة دي.

لسه مكملين مع السعودية لكن المرة دي مع الأميرة ريما بنت بندر سفيرة المملكة في الولايات المتحدة الأمريكية .. وكلامها اللي لقى تفاعل قوي على السوشيال ميديا وكانت بتتكلم فيه عن السياسة الجديدة للمملكة والقيادة الحكيمة لولي العهد الأميرة محمد بن سلمان .. طب قالت إيه ؟
الأميرة ريما عملت حوار من يومين مع بودكاست “The Mo Show” السعودي .. حكت فيه عن تفاصيل تعيينها سفيرة للمملكة في أمريكا لأول مرة في التاريخ .. ودور ولي العهد في الموضوع ده .
الأميرة ريما قالت إنها كانت بتحلم دائما بخدمة بلدها .. لكنها مكنتش بتحلم تكون في يوم من الأيام سفيرة في أمريكا .. لكن بفضل رؤية الأمير محمد بن سلمان اتحقق الحلم وأصبحت سفيرة لبلدها فعلا في أمريكا .. وقالت إن بن سلمان قائد عنده رؤية وأفكار حديثة .. لما مسك الحكم وشاف الوضع اللي كان عليه .. قال الوضع ده مش لازم يستمر ولازم يحصل تطوير .. وأفسح للمرأة المجال وشجعنا واتحدى بينا الجميع .. وطالبنا بمواصلة التقدم.
ووصفت الأميرة شعورها في أول يوم وصلت فيه واشنطن علشان تستلم شغلها كسفيرة للسعودية .. وقالت كده بالنص “كان أحد أكثر الأيام العاطفية في حياتي .. وقد كان بنفس العاطفية أو ربما أكثر من اليوم الذي أنجبت أطفالي” .. يعني بتقول إنه شعور أكبر من أحسن لحظة بتستناها أي إمرأة في الدنيا وهى الإنجاب .. وده بيوضحلك أهمية القرارات اللي بياخدها ولي العهد في السعودية دلوقتي والتغيير الكبير اللي بيحصل في المجتمع بفضل سياساته الحديثة .. ربنا يوفق المملكة قيادة وشعبا وتستمر في الازدهار والتقدم علطول.

لو تفتكروا كنا اتكلمنا امبارح عن دعوة الرئيس عبدالفتاح السيسي خلال كلمته في قمة المناخ بشرم الشيخ لإنهاء الحرب الروسية الأوكرانية .. وإنه مستعد للعب دور إذا اتطلب منه في أي وقت .. بعدها طبعا احتفت وسائل الإعلام العربية والعالمية بالدعوة دي وقالت إنها جاية في وقتها .. واستغلال كويس للقمة اللي بتعتبر حدث عالمي مش بيتكرر كتير .
النهاردة موقع سكاي نيوز عربية نشر تقرير بيحلل فيه الدعوة دي مع عدد من المحللين السياسيين والاستراتيجيين .. وبيشوف هل من الممكن إنها تكون بداية الانفراجة للأزمة اللي موجودة دلوقتي ولا لأ .
السفير رخا أحمد حسن وده عضو في المجلس المصري للشئون الخارجية ومساعد وزير خارجية سابق .. بيقول إن دعوة السيسي إيجابية جدا .. ونعول على أن تستجيب القوى الكبرى ليها وبالذات روسيا وأمريكا .. لأن منطقة الشرق الأوسط كانت من أكتر المناطق اللي اتضررت بسبب الحرب دي .. وبالذات لأنها بتستورد معظم أكلها ومستلزمات الإنتاج من روسيا وأوكرانيا.
بيقول كمان إن الحرب أدت إلى أزمة طاقة كبيرة وارتفاع في الأسعار غير مسبوق .. وده بيعتبر الجانب الأسوأ فيها .. وعلشان كده لازم قادة العالم يتدخلوا دلوقتي علشان تنتهي الحرب دي بالتفاوض بأقصى سرعة ويستجيبوا لدعوة الرئيس السيسي لأن العالم خلاص مبقاش مستحمل.

عرض المزيد