ماذا يعني انضمام السعودية و مصر الي منظمة البريكس وتاثيرة علي الاقتصاد و ماهو دور المنظمة

ديسمبر 5, 2022


في سؤال مهم ناس كتير بدأت تسأله دلوقتي .. وهو ليه الدول بتتسابق على الانضمام لمنظمة بريكس .. ولو تفتكروا كنا عملنا حلقة عن المنظمة دي قبل كده .. لما السعودية أعلنت إنها عاوزة تنضم ليها .. وقبلها مصر وتركيا وغيرها من الدول .. طب إيه قصة المنظمة دي .. وأهدافها إيه .. وإزاي الدول بتنضم ليها .. ومين أعضاءها دلوقتي .. وهل المنظمة دي هتكون نواة لتشكيل نظام عالمي جديد على أنقاض الإمبراطورية الأمريكية ولا لأ .. يلا بينا

إيه قصة منظمة بريكس؟

المنظمة دي اتأسست سنة 2006 .. وهي اختصار للأحرف الأولى باللغة الإنجليزية لأسماء الدول المكونة للمنظمة (البرازيل، روسيا، الهند، الصين، جنوب إفريقيا). التكتل ده يعتبر صاحب أسرع نمو اقتصادي في العالم .. وبيساهم بحوالي 25% من إجمالي الناتج العالمي .. ومساحته حوالي 30% من مساحة الأراضي في العالم .. ومن المتوقع في سنة 2050 إن اقتصادات دول “بريكس” تنافس اقتصاد أغنى الدول في العالم. طب إيه بقى أهداف المنظمة دي ؟ علشان نفهم الأهداف لازم نعرف الأول ظروف نشأة المنظمة .. المنظمة دي اتأسست بعد الأزمة المالية العالمية اللي حصلت في 2008 .. اللي كانت بسبب السياسات الأمريكية الخاطئة .. واللي غرقت العالم كله بسببها . وقتها الرئيس الروسي ميدفيدف دعا رؤساء الصين والهند والبرازيل للحضور إلى روسيا .. وعقد معاهم أول قمة للمنظمة .. علشان تناقش الضرر اللي وقع عليها بسبب سياسات الولايات المتحدة الأمريكية الخاطئة .. وإزاي يقدروا يخرجوا من الأزمة المالية دي .. وساعتها الرئيس الروسي قال في ختام القمة إننا أه ناقشنا إزاي نخرج من الأزمة دي .. لكن كمان التعاون بيننا هيكون أكبر في الفترة الجاية .. والمشكلة الأكبر قدامنا هى إزاي نخلق نظام عالمي جديد أكثر عدلا .. وهنا لازم نحط خط تحت كلمة أكثر عدلا دي .. لأنها مهمة جدا .. بسبب فشل الولايات المتحدة في قيادة العالم.

من الفترة دي لغاية سنة 2017 كانت المنظمة مقفولة على الخمس دول بس .. لحد ما الصين في 2017 قالت إننا ممكن نعمل حاجة نسميها بريكس بلس .. يعني ندعو دول تانية تشارك معانا في المنظمة لكن بشكل غير رسمي .. وتحضر مؤتمراتها واجتماعاتها .. علشان نزود التعاون مع الدول الجديدة دي .. وبالفعل في شهر 6 اللي فات .. الرئيس الروسي بوتين قال إن المنظمة وافقت على فتح باب العضوية لدول جديدة .. والرئيس الصيني قال إننا عاوزين نسرع شوية إجراءات الانضمام دي . طب مين بقى الأعضاء الجدد دول اللي عاوزين يدخلوا منظمة بريكس؟ الأعضاء هما الأرجنتين وإيران وتركيا ومصر والسعودية والجزائر .. وفي عدد تاني من الدول على رادار بريكس والمنظمة عاوزة تدعوهم إلى الانضمام .. زي أندونيسيا ونيجيريا وتايلاند والسنغال والإمارات . هنا في سؤال مهم .. هل المنظمة عاوزة تضم أي دولة كدة وخلاص .. ولا بتختار دول بعينها ؟ .. الحقيقة إن المنظمة بتختار الدول المحورية واللي بتتمتع بموقع استراتيجي وأسواق كبيرة وإزدهار اقتصادي محتمل .

نيجي بقى للسؤال الأهم .. ليه الدول بتتهافت وتتسابق على الإنضمام لمنظمة بريكس؟ الإجابة هى بسبب الأجواء والظروف السياسية والاقتصادية الدولية الصعبة اللي بيشهدها العالم دلوقتي .. وبالذات بعد اندلاع الحرب الروسية الأوكرانية .. والمنافسة الشرسة بين الغرب والشرق .. وأجواء الاستقطاب اللي بيشهدها العالم دلوقتي . كمان الأجواء دي بتشبه لحد كبير أجواء الحرب الباردة اللي حصلت في الفترة من نهاية الحرب العالمية الثانية وحتى سقوط الاتحاد السوفيتي سنة 1991 .. وفي الحرب دي كان في معسكرين .. واحد بقيادة الاتحاد السوفيتي في الشرق وواحد بقيادة الولايات المتحدة في الغرب .. وكل معسكر فيهم كان عاوز يستقطب أكبر عدد من الحلفاء .. وإحنا دلوقتي رجعنا للمرحلة دي ونفس الأجواء بتاعتها .. الصين وروسيا عاوزين يبقى معاهم أكبر عدد من الحلفاء .. وأمريكا بتحاول تحافظ على حلفاءها وتزودهم لو قدرت .. وعلشان كده مش غريب إن منظمة بريكس عاوزة دلوقتي تضم دول جديدة ليها .. فمن ناحية المنظمة عاوزة تزود قوتها وتستقطب حلفاء جداد .. ومن ناحية تانية الدول هتستفيد من وجودها في كيان كبير زي ده .. لأنه هيعزز قوتها الاقتصادية والسياسية بشكل كبير .. يعني بالبلدي كده كل طرف من الطرفين مستفيد ومحدش خسران حاجة .. المنظمة هتستفيد والدول الجديدة هتستفيد اقتصاديا وسياسيا.

عرض المزيد