احتفالات هستيرية في الوطن العربي بعد فوز السعودية على الارجنتين في مونديال 2022

ديسمبر 5, 2022


احتفالات هستيرية في الوطن العربي بعد فوز السعودية على الأرجنتين .. ولي العهد يسجد شكرا بعد الفوز .. ومفاجأة من تركي آل الشيخ .. ومقامر أسترالي يخسر 160 ألف دولار بسبب فوز السعودية

فوز تاريخي للمنتخب السعودي

النهاردة حلقتنا سعودية بامتياز بمناسبة الفوز التاريخي للمنتخب السعودي على المنتخب الأرجنتيني في أول مباراة للفريقين في كأس العالم بهدفين لهدف واحد .. طبعا المنتخب السعودي شرف الكرة العربية كلها مش الكرة السعودية بس .. وقال إن العالم العربي يقدر يحقق المعجزات .. وإن إمكانيات اللاعبين العرب زيها زي الأوروبيين والأمريكيين ومش أقل منهم في حاجة .. والدليل إننا فوزنا على الأرجنتين في كأس العالم السنة دي .. وقبلها منتخب مصر فاز بردو على منتخب إيطاليا لو تفتكروا في كأس العالم للقارات سنة 2009. بعد الفوز ده طبعا .. الاحتفالات الهستيرية كانت مليانة في شوارع العالم العربي كله مش السعودية بس .. من سوريا والعراق ولبنان .. لليمن والإمارات ومصر .. كل الدول العربية تقريبا احتفلت مع الممكلة العربية السعودية امبارح بفوزهم التاريخي على ميسي ورفاقه في منتخب الأرجنتين .. وده مكنش لمجرد الفوز بس في النتيجة .. لكن كمان الأداء كان رجولي وجامد من طل اللاعيبة بصراحة .. الكل عمل اللي عليه وزيادة .. لكن المهم الفرحة دي ما تخليش اللاعيبة تنسى إن لسه في ماتشين تاني في المجموعة ولازم السعودية تفوز في واحد فيهم على الأقل علشان تصعد للدور التاني .. مش معقولة بعد ما نكسب الأرجنتين نتعادل أو نخسر ونخرج من البطولة. وأول ما خلص الماتش نشرت حسابات على مواقع التواصل الاجتماعي صور لاحتفال ولي العهد الأمير محمد بن سلمان بالفوز على الأرجنتين .. الصورة الأولى كان فيها بيسجد لله شكرا على الفوز .. والتانية كان بيحضن أصدقائه اللي كانوا قاعدين معاه بيتفرجوا على الماتش.

كمان الملك سلمان بن عبد العزيز أمر بإن النهاردة الأربعاء يكون يوم عطلة رسمية بمناسبة الفوز .. اللي اعتبره ناس كتير مفاجأة من العيار الثقيل .. لأن الأرجنتين بتعتبر واحدة من المرشحين للفوز بكأس العالم .. وإن السعودية تفوز عليها يبقى دي مفاجأة كبيرة .. مع إن أنا مش شايف إنها مفاجأة ولا حاجة .. لأن المنتخب السعودي قوي ..وعنده دوري جامد فيه لاعيبة جامدة جدا .. خلت مستوى اللاعيبة السعوديين جامد زيهم. النتيجة دي خلت المنتخب السعودي يتصدر المجموعة بعد تعادل المكسيك وبولندا في الماتش التاني .. كمان السعودية بقت أول منتخب غير أوروبي يفوز على الأرجنتين في كأس العالم منذ فوز الكاميرون عليها سنة 1990.. وأول منتخب آسيوي يفوز على الأرجنتين في تاريخ المونديال. والخسارة دي تعتبر الأولى للأرجنتين من شهر يوليو 2019 .. بعد سلسلة استمرت لـ 36 مباراة بدون خسارة. ورغم الفوز والفرحة .. لكن إصابة اللاعب ياسر الشهراني القوية زعلتنا كلنا .. لما اتخبط خبطة جامدة مع حارس المرمى محمد العويس .. واتنقل بسرعة لمدينة حمد الطبية .. واتعمل له كل الفحوصات الطبية اللازمة .. والحمدلله دلوقتي بقى أحسن وطلع في فيديو طمن فيه الجمهور على حالته ووضعه الصحي .. وقال إنه كويس وبصحة جيدة .. وطلب من الجمهور إنه يدعيله يقوم بالسلامة.

طبعا الفوز على الأرجنتين مكنش ينفع يعدي كده عادي على تركي آل الشيخ رئيس هيئة الترفيه السعودية .. وكان لازم يقدم هدية للشعب السعودي بالمناسبة دي .. وفعلا أعلن عن إتاحة مناطق فعاليات موسم الرياض الترفيهي مجانا للجمهور.
وكتب تركي آل الشيخ على صفحته الرسمية على موقع “تويتر” إن “البولفيارد سيتي والبوليفارد ورلد وونتر لاند مجاناً بمناسبة فوز المنتخب”. كمان حصلت حاجة طريفة جدا بسبب فوز السعودية على الأرجنتين .. طب إيه هى ؟ صحيفة الديلي ميل البريطانية قالت إنه كان في واحد استرالي مقامر راهن على خسارة المنتخب السعودي للماتش بمبلغ كبير جدا وهو 160 ألف دولار .. ويا عيني خسر الرهان بتاعه بعد الماتش لما عرف إن السعودية كسبت. الرهان اللي كان على الماتش هو إن المقامر الاسترالي ده ترجعله فلوسه 180 ألف دولار بدل 160 ألف .. يعني كان هيكسب 20 ألف دولار .. لو السعودية خسرت .. لكن الحمدلله إنه خسر الرهان. مش بس كده ده كمان مقامر تاني خسر رهان بـ 100 ألف دولار .. بعد ما كان راهن حد تاني بإن الأرجنتين هتفوز لفارق 3 أهداف أو أكتر .. وكان هيكسب 170 ألف دولار .. لكن رجع برده من غير فلوس في الآخر بعد ما الأرجنتين خسرت. أكيد مكنش ينفع ننهي حلقتنا النهاردة من غير ما نتكلم عن أبطال مباراة السعودية والأرجنتين اللي جابوا الهدفين .. سالم الدوسري وصالح الشهري .. اللي بيعتبروا من أهم العناصر الأساسية في تشكيل المنتخب السعودي .. وبيقودوا هجوم المنتخب في كأس العالم. الأول سالم الدوسري عنده 31 سنة .. وبيلعب في نادي الهلال .. وشارك مع المنتخب السعودي في 55 مباراة دولية .. سجل فيها 16 هدف وصنع 3.كمان لعب نهائيات مونديال روسيا 2018 .. وشارك في 3 مباريات قدام روسيا والأوروجواي ومصر .. وسجل هدف واحد في التلات مباريات كان قدام مصر. أما صالح الشهري عنده 29 سنة .. وبيلعب في نادي الهلال بردو .. وشارك مع المنتخب السعودي في 19 مباراة دولية .. سجل فيها 10 أهداف .. ملعبش في كأس العالم اللي كان في روسيا .. لكنه لعب في قطر وأحرز هدف تاريخي .. هيفضل محفور في التاريخ لسنين طويلة.

عرض المزيد