مصيدة سعودية أمريكية للطائرات المسيرة الإيرانية

ديسمبر 5, 2022


مصيدة سعودية أمريكية للطائرات المسيرة الإيرانية .. إيران: لدينا عتاب على السعودية بسبب دعم الاحتجاجات في طهران .. الناتو: لا سلام دائم في أوكرانيا إذا انتصرت روسيا
دي مواضيع حلقتنا انهاردة … يلا بينا نشوف التفاصيل

عودة المفاوضات بين السعودية وإيران

الكلام عن عودة المفاوضات بين المملكة العربية السعودية وإيران بيظهر على السطح كل فترة والتانية .. والنهاردة وزير الخارجية الإيراني حسين أمير عبداللهيان .. قال إن إيران عندها أمل في استئناف المفاوضات بين طهران والرياض الفترة الجاية .. بعد ما المفاوضات اللي كانت شغالة بين البلدين برعاية العراق وقفت بقالها شهور كتيرة. وزير الخارجية الإيراني بيقول إنهم متمسكين بالمفاوضات مع المملكة لأنها مفيدة وفعالة لتوفير السلام والأمن في منطقة الشرق الأوسط .. لكنه رجع وقال بردو إن إيران عندها عتاب على المملكة العربية السعودية لأنها بتتدخل في الشئون الداخلية الإيرانية وبتدعم الاحتجاجات اللي شغالة دلوقتي في المدن الإيرانية بعد وفاة الفتاة مهسى أميني على إيد شرطة الأخلاق من فترة.
طب العتاب ده ليه بردو ؟ بيقولك علشان في قناة محسوبة على السعودية بتحث على الإرهاب والاغتيالات خلال الاحتجاجات الداخلية الأخيرة في إيران .. وإن الخارجية الإيرانية بلغت المسئولين السعوديين بالكلام ده .. وإن اللي بيحصل ده بيتعارض مع اتفاقيات طهران والرياض في بغداد . بيقول كمان إن إيران منا ناحيتها التزمت باللي تم الاتفاق عليه في الدورة الخامسة من الحوار الإيراني السعودي اللي حصل في العاصمة العراقية بغداد .. لكن جوانب تانية من الاتفاق السعودية ما التزمتش بيها. طبعا الكلام ده جاي بعد ما المتحدث باسم الخارجية العراقية أحمد الصحاف .. قال في حوار مع الوكالة العراقية .. إن جهود العراق للوساطة بين إيران والسعودية مستمرة .. وإن المفاوضات انتقلت من المسار الأمني إلى الدبلوماسي .. يعني في تقدم والمفاوضات قربت ترجع تاني .. لأن المفاوضات دي مهمة بين إيران والسعودية علشان تقريب وجهات النظر وحل القضايا المتبقية بين البلدين وحماية مصالحهم.

الخبر اللي جاي ده مهم جدا .. ليه بقى .. لأنه طالع من أهم مسئول أمريكي في منطقة الشرق الأوسط .. وهو الجنرال مايكل كوريلا قائد القيادة المركزية الأمريكية .. وبيتكلم عن موضوع خطير جدا .. وهو إزاي أمريكا هتتعاون مع السعودية لمواجهة إيران والطيارات المسيرة بتاعتها اللي بتضرب بيها الأهداف السعودية كل شوية .. طب قال إيه الجنرال كوريلا؟ بيقولك إن أمريكا والسعودية بيشتغلوا دلوقتي على عمل “مصيدة” أميريكية سعودية مبتكرة بالتعاون مع الشركاء في المنطقة .. علشان يواجهوا الطيارات المسيّرة دون طيار الإيرانية .. وقال في حوار مع صحيفة الشرق الأوسط السعودية .. إن أمريكا ملتزمة بتعميق التعاون والتنسيق بين القيادة المركزية وجميع شركائها في المنطقة لمكافحة التهديد الحوثي الإيراني المشترك .. اللي عاوز يهاجم المملكة بالطائرات المسيّرة بدون طيّار. كمان بيقول إن القوات الأمريكية مستمرة في عمليات مكافحة التهريب مع القوات البحرية الملكية السعودية .. لوقف شحن الذخائر التقليدية والمتطورة عن طريق البحر لدعم عمليات الحوثيين في اليمن .. وإن التعاون ده نجح في إنه يمنع دخول المواد المتفجرة إلى المنطقة من إيران في الفترة الأخيرة .. لما اعترضت القوات المشتركة في يوم 8 نوفمبر مركب عديم الجنسية في خليج عمان مصدره إيران .. كان عاوز يهرب كمية هائلة من المواد المتفجرة إلى اليمن .. منها 360 ألف رطل من سماد (اليوريا) اللي بيستخدم في صناعة المتفجرات .. وكلورات الأمونيوم اللي بيستخدم كوقود للصواريخ الباليستية.

أما بقى بخصوص استراتيجية التعاون العسكري السعودي الأميريكي .. فقال إن القوات المسلحة السعودية من أكتر شركاء القيادة المركزية الأمريكية ثقة وقدرة على القتال .. وإن التعاون العسكري بين أمريكا والسعودية بالغ الأهمية لتعزيز الأمن والاستقرار في المنطقة .. وبيخدم كل الدول في الشرق الأوسط مش السعودية بس. وقال كوريلا إن الدفاع الجوي والصاروخي المتكامل .. وتعطيل الأسلحة التقليدية المتقدمة المنتجة في إيران .. بما في ذلك اللي تم تزويد الحوثيين بيها . بيعتبر من الأولويات الوظيفية بالنسبة لهم ولشركائهم العسكريين .. يعني بالبلدي كده عاوز يقولك إن إحنا موجودين هنا في الشرق الأوسط وبنتعاون مع السعودية علشان نوقف إيران عند حدها .. ونمنع المياة والنور عن الحوثيين في اليمن. بيقول كمان إن الطيارات المسيرة الإيرانية دي مش بتهدد بس أراضي المملكة العربية السعودية .. لأ .. دي كمان بتهدد القوات العسكرية الأمريكية والسكان المدنيين.. وعلشان كده إحنا بنتعاون مع القوات المسلحة السعودية بشكل كبير الفترة الأخيرة .. علشان نشوف حل تكنولوجي جديد لمواجهة الطيارات دي.

عرض المزيد