السعودية تتحدي امريكا وتقود الشرق الاوسط الي عالم ثلاثي الاقطاب مع زيارة الرئيس الصيني للسعودية

ديسمبر 15, 2022


كيف ردت أمريكا على زيارة الرئيس الصيني إلى السعودية .. لأول مرة أوكرانيا تضرب قواعد عسكرية في العمق الروسي في تطور خطير للحرب .. هل هيتماسك الجنيه المصري أمام الدولار بعد وصول أول شريحة من قرض صندوق النقد؟
يلا بينا نشوف التفاصيل

زيارة الرئيس الصيني للسعودية

زي ما انتوا عارفين إن الرئيس الصيني شي جين بينغ هيزور المملكة العربية السعودية خلال الأيام دي .. لكن محدش كان لسه أعلن تفاصيل الزيارة بالظبط وإيه اللي هيحصل فيها .. النهاردة بقى وزارة الخارجية السعودية قالت إن الزيارة هتبدأ يوم الأربع وتنتهي الجمعة وهيتعمل فيها 3 قمم مهمة جدا. القمة الأولى هتكون قمة سعودية – صينية برئاسة الملك سلمان والرئيس الصيني .. وبمشاركة ولي العهد الأمير محمد بن سلمان .. القمة التانية هتكون “قمة الرياض الخليجية الصينية للتعاون والتنمية” .. والقمة التالتة هتكون “قمة الرياض العربية الصينية للتعاون والتنمية” .. وهيشارك فيهم قادة دول مجلس التعاون الخليجي والدول العربية .. علشان يناقشوا تعزيز العلاقات المشتركة مع الصين في كافة المجالات .. وبالذات التعاون الاقتصادي والتنموي. لكن هنا في سؤال مهم لازم نسأله .. هل الزيارة دي ممكن أمريكا تعتبرها تحدي مباشر ليها .. وإن الصين ممكن تاخد مكانها في منطقة الشرق الأوسط والخليج .. ده اللي رد عليه النهاردة جون كيربي منسق الاتصالات الاستراتيجية في مجلس الأمن القومي بالبيت الأبيض .. لما قال إن الولايات المتحدة ما بتعتبرش الزيارة دي تحدي ولا حاجة .. لأنها مش بتطلب من أي دولة الاختيار بينها وبين الصين .. وإن لو أصدقاءنا في الشرق الأوسط عاوزين يقابلوا الرئيس الصيني يتفضلوا يقابلوه وده من حقهم طبعا .. إنما أمريكا بتشوف مصلحتها فين وبتروح لها. كمان قال إن أمريكا بتركز دلوقتي على علاقاتها ومصالحها الأمنية في الشرق الأوسط على المستوى الثنائي والمتعدد الأطراف .. لكن مش معنى كده إنها هتمشي من المنطقة وتسيب فراغ تملاه الصين وروسيا .. لأ .. إحنا مستمرين في المنطقة لكن وفقا لمصالحنا.

وقال إن أكبر دليل على كده هو زيارة الرئيس الأمريكي جو بايدن للمملكة العربية السعودية في شهر يوليو الماضي .. وده معناه إن لسه في قضايا تهم أمريكا في الشرق الأوسط ومحتاجة تناقشها مع القادة بتوعه .. وعلشان كده إحنا هنركز على توطيد العلاقات مع دول المنطقة الفترة الجاية ومش هنسيبها للصين أو روسيا. طبعا الكلام ده أمريكا بتقوله كده في وسائل الإعلام بس .. إنما هى أكيد زعلانة جدا ومتضايقة جدا من المملكة العربية السعودية .. لأنها بدأت تتجه إلى الصين وروسيا بدل منها .. وخصوصا بعد عدم مبالاة الأمير محمد بن سلمان بضغوطها علشان يرفع إنتاج النفط الفترة اللي فاتت .. واستمر على موقفه بخفض الإنتاج.

النهاردة بقى حصل تطور خطير جدا في الحرب الروسية الأوكرانية وممكن يقلب الوضع رأسا على عقب الفترة الجاية .. طب إيه الحكاية ؟ الحكاية إن النهاردة أوكرانيا ضربت لأول مرة من ساعة بداية الحرب دي العمق الروسي والقواعد العسكرية الموجودة في العمق بتاع روسيا .. طب إزاي ده حصل .. أقولك يا سيدي .. أوكرانيا استهدفت قاعدتين على بعد مئات الأميال داخل روسيا عن طريق استخدام طائرات مسيرة .. دمرت طائرتين على الأقل في قاعدة من القاعدتين الروسيتين .. واتسببت في أضرار لطيارات تانية .. وده أدى إلى وفاة 3 عناصر من الجيش الروسي صحيفة الجارديان البريطانية بقى نشرت مقال بعد اللي حصل ده وقالتلك إن الحرب بدأت تاخذ منعطف خطير دلوقتي .. لأنه بعد ما التوقعات كانت بتقول إن العملياتالعسكرية بدأت تهدا وهتقل في الشتاء .. جت القوات الأوكرانية النهاردة وضربت العمق الروسي لأول مرة من ساعة الحرب ما بدأت .. وده خلا روسيا ترد على الكلام ده بسرعة بوابل من الضربات الصاروخية على منشأت الطاقة في أوكرانيا .. علشان تزود الأزمة اللي بتعاني منها بعد ما تم تدمير 40% من البنية التحتية للطاقة في جميع أنحاء أوكرانيا الفترة اللي فاتت.

عرض المزيد