اكبر صفقات القرن بين السعودية و الصين وسط ذهول امريكي

ديسمبر 15, 2022


اتفاقيات بـ 29 مليار دولار بين السعودية والصين خلال زيارة الرئيس الصيني .. معهد دراسات: أمريكا السبب في زعزعة استقرار أوروبا .. مصريون يخترقون أقوى جدار إسرائيلي بطريقة غريبة ويشتبكون مع الجيش
يلا بينا نشوف اصل الحكاية

زيارة الرئيس الصيني للسعودية

بنكمل معاكم النهاردة متابعتنا لزيارة الرئيس الصيني شي جين بينغ للمملكة العربية السعودية .. واللي من المتوقع إنها تشهد توقيع 20 اتفاقية بين البلدين بحوالي 110 مليار ريال يعني 29 مليار دولار. كمان على هامش القمة الثنائية بين ملك السعودية ورئيس الصين هيتم توقيع وثيقة شراكة استراتيجية .. وخطة مواءمة بين رؤية المملكة 2030 ومبادرة الحزام والطريق .. وهيتعمل 3 قمم هيحضرها 30 قائد من الدول والمنظمات الدولية .. بالإضافة إلى الإعلان عن إطلاق جائزة الأمير محمد بن سلمان للتعاون الثقافي بين السعودية والصين. طبعا الكلام ده جاي في الوقت اللي 15 ‏شركة صينية أعلنت عن رغبتها في الاستثمار في المملكة والدخول في مشاريع حكومية كتيرة الفترة الجاية .. وبالذات مشاريع البنية التحتية.. وبالفعل بدأت شركات صينية في تنفيذ مشاريعها .. زي مثلا شركة (Shengkong) اللي وضعت حجر الأساس لمصنع مصابيح الإضاءة (LED) في مدينة الجبيل بقيمة حوالي 3.3 مليار ريال .. كمان شركة بان آسيا الصينية دشنت مشروع للصناعات الأساسية والتحويلية في مدينة جازان باستثمارات حوالي 4 مليار دولار. كمان المملكة بتستعد هى والصين لإطلاق مشروع شركة سابك فوجيان للبتروكيماويات المحدودة .. وده مشروع هينتج منتجات بتروكيماوية كتيرة .. واستثماراته حوالي 22.5 مليار ريال. هنا في ناس ممكن تسأل سؤال مهم .. الميزان التجاري بين البلدين لصالح مين دلوقتي .. هل الصين ولا السعودية .. الأرقام بتقول إن قيمة التجارة بين الصين والمملكة في 2021 وصلت إلى 87.3 مليار دولار .. الصادرات الصينية منها للسعودية وصلت إلى 30.3 مليار دولار .. أما واردات الصين من المملكة وصلت إلى 57 مليار دولار .. يعني الميزان التجاري في صالح المملكة العربية السعودية .. وده طبعا يرجع إلى صادرات النفط الخام .. لأن بيانات الجمارك الصينية بتقول إن السعودية هي أكبر مورد للنفط للصين .. وبتوفر لها 18% من إجمالي مشتريات الصين من النفط الخام.

من هنا نفهم أد إيه الزيارة بتاعت الرئيس الصيني دي مهمة للبلدين .. الصين من ناحيتها عاوزة تخلي الميزان التجاري يكون لصالحها وتزود استثماراتها في السعودية .. والمملكة بردو عاوزة تحافظ على تفوقها ده وكمان تستفيد من الخبرات الصينية في الصناعة .. وعلشان كده هيكون في اتفاقيات بحوالي 29 مليار دولار في الزيارة دي. النهاردة حصلت حاجة غريبة جدا مش متعودين نسمعها في الأخبار .. طب إيه هى؟ .. إسرائيل أعلنت إنه كان في 10 مهربين مصريين عاوزين يخترقوا الحدود المصرية الإسرائيلية ويدخلوا إسرائيل .. لكن تم إحباط المحاولة دي من خلال التعاون بين الجيش المصري والإسرائيلي . القناة العاشرة الإسرائيلية أعلنت عن تنفيذ عملية أمنية مشتركة بين الجيشين الإسرائيلي والمصري .. أدت إلى إحباط محاولة عبور 10 مهربين من الحدود المصرية إلى داخل إسرائيل .. كان معاهم مخدرات عاوزين يهربوها إلى إسرائيل. البداية كانت عن طريق اكتشاف فرق أمنية تابعة للجيش الإسرائيلي محاولة مشتبهين بتهريب المخدرات عبور الحدود المصرية إلى الأراضي الإسرائيلية .. راح حرس الحدود المصري أطلق النار عليهم .. وبعدها قامت قوة الجيش الإسرائيلي باعتقال عشرة من المشتبه بهم وصادرت المخدرات اللي كانت معاهم.

القناة العبرية بتقول إن المهربين بدأوا يستخدموا أساليب جديدة في التهريب .. واحتمال المرات الجاية ينجحوا في عبور الحدود .. لأنهم في العادة كانوا بيجوا لغاية الحدود ومعاهم المخدرات .. ويرموها من فوق السياج الحدودي علشان ياخدها المهربين الإسرائيليين ويدخلوها البلد .. لكن اتضح إنهم بدأوا يستخدموا طريقة جديدة .. وبدل ما يرموا المخدرات من فوق السياج ويستنوا في المكان لغاية ما المهربين الإسرائيلين ياخدوها .. بقوا بيجيبوا معاهم مواقد عند السياج الحدودي علشان يعملوا فتحات فيه يعدوا منها للناحية التانية ويدخلوا إسرائيل بنفسهم .. ويقابلوا المهربين الإسرائيليين في الأماكن المجهزة لتسليم المخدرات. المسؤولين في الجيش والشرطة الإسرائلية قالوا إن ده حصل بسبب خوف المهربين الإسرائيليين من القبض عليهم واعتقالهم.. وعلشان كده بيطلوا من المصريين إنهم يعبروا الحدود بنفسهم عكس ما كان بيحصل الأول .. وكمان علشان المهربين المصريين دول غالبا هيكونوا عايشين في سيناء وهيتم الإفراج عنهم بعد كده بسهولة وتسليمهم لمصر. وفعلا هو ده اللي حصل .. لأن قوات الأمن الإسرائيلية قبضت على المهربين المصريين .. وسلمتهم لجهات التحقيق اللي من المتوقع إنها تؤمر بتسليمهم إلى مصر لأنهم كلهم بيحملوا الجنسية المصرية.
طبعا الحادث ده خلا مصادر عسكرية بقيادة المنطقة الجنوبية الإسرائيلية تحذر من إن اللي حصل ده ممكن يخلي بعد كده المهاجرين غير الشرعيين والإرهابيين يدخلوا إسرائيل بنفس الطريقة .. وقالوا إنه زي ما المهرب ممكن يدخل الأراضي الإسرائيلية كده .. مش بعيد إن الإرهابي كمان ممكن يعملها.

عرض المزيد