محمد بن سلمان و محمد بن زايد مجننين الامريكان

ديسمبر 15, 2022


تصريحات سعودية جديدة حول العلاقة مع إيران .. دور محمد بن سلمان في صفقات تبادل الأسرى بين أمريكا وروسيا.. تصاعد الاحتجاجات في إيران بعد إعدام محسن شكاري .. اتهام دولة خليجية بإعطاء رشوة لنائبة رئيس البرلمان الأوروبي

محمد بن سلمان و محمد بن زايد

لسه أصداء وتداعيات زيارة الرئيس الصيني شي جين بينغ إلى المملكة العربية السعودية شغالة لغاية دلوقتي .. والنهاردة هنتكلم عن تصريحات وزير الخارجية السعودية الأمير فيصل بن فرحان عن العلاقة بين المملكة وإيران .. واللي قال فيها كلام مهم لازم نعرفه .. طب قال إيه ؟ الأمير فيصل بن فرحان قال بعد القمة الخليجية الصينية إن إيران جزء من المنطقة وجارة وهنستمر في مد الإيد ليها .. علشان يكون في علاقة إيجابية معاها تخدم استقرار المنطقة ورفاهية شعوبها .
كمان قال إنه زي ما الصين حريصة جدا على أمن واستقرار المنطقة .. السعودية ودول الخليج كمان حريصين جدا على أمن واستقرار المنطقة .. وجزء من الاستقرار ده بلا شك هو الوصول إلى علاقة إيجابية بين دول المنطقة وإيران .. لأنها في النهاية جزء من المنطقة ومفيش استقرار هيحصل إلا بعلاقة جيدة بين المملكة العربية السعودية ودول الخليج والمنطقة مع جارتها إيران. وقال إن السعودية هتستمر في إنها توصل لعلاقة إيجابية مع إيران الفترة الجاية .. وبالذات إننا بنسمع كل شوية تصريحات كويسة من المسئولين بتوعهم .. وده ممكن يخلينا نترجم التصريحات دي إلى علاقة حقيقية إيجابية تخدم رفاهية الشعوب كلها مش بس أمن واستقرار المنطقة .. وده ممكن يحصل لكن محتاج إيجابية وجدية أكتر من كل الأطراف .. وعلشان كده إحنا بنرحب بأي حد بيسعى لتهيئة الأجواء المناسبة لكده. وزير الخارجية السعودية اتكلم بردو عن دور الأمير محمد بن سلمان والشيخ محمد بن زايد رئيس دولة الامارات في صفقات تبادل الأسرى الفترة الأخيرة بين روسيا وأوكرانيا وروسيا وأمريكا .. وآخرها كان الإفراج عن لاعبة السلة الأمريكية بريتني غراينر من سجن روسي مقابل الإفراج عن تاجر السلاح الروسي فيكتور بوت اللي كان مسجون في أمريكا .. وقال إن ولي العهد كان بيشرف بنفسه على الصفقات دي .. وجهوده كانت واضحة فيها.

وقال كمان إننا مش لازم ننسى إنه هو بردو اللي اتوسط للإفراج عن الأسرى الـ 10 الأمريكان والبريطانيين والمغاربة اللي كانوا موجودين في روسيا مقابل إفراج أوكرانيا عن أسرى روس عندها.
الغريبة ان البيت الأبيض قال ان المحادثات التي ساهمت في الإفراج عن غرينر، كانت بشكل مباشر مع المسؤولين في موسكو، مؤكدًا أنه لم تكن هناك أي وساطة خارجية في التفاوض مع روسيا. طيب لية نكران الجميل هو يعني ولا دي غيرة بقي ؟ طبعا الكلام ده نفهم منه إننا ممكن نلاقي عودة تدريجية للعلاقات السعودية الإيرانية الفترة الجاية وعودة المفاوضات مرة تانية اللي كانت شغاله في العراق وتوقفت من فترة .. كمان نفهم بردو زيادة دور ولي العهد السعودي محمد بن سلمان القيادي على المستوى الدولي الفترة الأخيرة .. وإنه هيزيد أكتر الفترة الجاية. لسه مكملين مع إيران لكن المرة دي بسبب الاحتجاجات الكبيرة اللي اشتغلت في العاصمة طهران ومدينة الأهواز بسبب إعدام الشاب محسن شكاري .. اللي يعتبر أول حالة إعدام تتنفذ من ساعة ما الاحتجاجات بدأت من 3 شهور .. طب إيه اللي حصل ؟ اللي حصل إن إيران نفذت يوم الخميس اللي فات أول حكم إعدام مرتبط بالاحتجاجات لشاب اسمه محسن شكاري عنده 23 سنة .. طب ليه يا إيران عملتي كده . قالت لأن محسن شكاري ده يعتبر مثير للشغب وصدر عليه حكم قضائي بالإعدام بسبب قطع وغلق شارع ستار خان بطهران يوم 25 سبتمبر اللي فات .. وجرح واحد من عناصر الأمن من قوات الباسيج بساطور.

طبعا الإعدام ده خلا المظاهرات تشتعل أكتر وبدأت تزيد أعدادها في العاصمة طهران ومدينة الأهواز للتنديد بقمع النظام للمظاهرات الشعبية في البلد .. كمان قوات الأمن الإيرانية هاجمت محتجين في منطقة ستارخان وسط العاصمة طهران لأنهم كانوا بيرددوا هتافات “الموت لخامنئي”، و”الموت للباسيج”، و”الموت للنظام قاتل الأطفال”. أكيد بعد الإعدام ده كان لازم حد من السياسيين يطلع يتكلم .. وده اللي حصل بالفعل لما الزعيم الإصلاحي في إيران مهدي كروبي قال إن النظام الإيراني بيمهد لإزهاق الأرواح بإعدام محسن شكاري علشان يرضي أصحاب السلطة. كمان كروبي انتقد المرشد الأعلي علي خامنئي .. وقال إن هدفه من عملية الإعدام دي هو تحذير أي حد معارض ليه ولاستبداده إنه ممكن يحصل فيه نفس اللي حصل مع محسن شكاري .. لكنه مش مدرك إن الطريقة دي مبقتش تجيب نتيجة مع الشعب الإيراني خلاص. النهاردة تم إلقاء القبض على نائبة رئيسة البرلمان الأوروبي اللي اسمها إيفا كايلي .. علشان يحققوا معاها في اتهامات إنها خدت رشاوى من دولة خليجية البيان بتاع البرلمان مجبش اسمها .. لكن وكالة الأنباء الفرنسية ووسائل إعلام بتقول إن سلطات التحقيق البلجيكية عندها شك في إن الدولة دي هى قطر .. لأنها كانت عاوزة يبقى لها تأثير على قرارات البرلمان الأوروبي سواء بالأموال أو بالهدايا.

عرض المزيد