السعودية تنتقم من امريكا بصفقة ضخمة مع بريطانيا وخيبة امل كبيرة للامريكان

ديسمبر 19, 2022


السعودية توقع خطة تعاون عسكري ودفاعي مع بريطانيا .. أوكرانيا تتراجع وتعلن خطة لاتفاق سلام لكن روسيا ترفض .. وأوروبا تحاول إنقاذ أوكرانيا من الشتاء القارس بمليار يورو

نهاية الحرب الروسية الأوكرانية

شكلنا كده هنبدأ ندخل في مرحلة نهاية الحرب الروسية الأوكرانية الفترة الجاية .. طب ليه أنا بقول كده .. بقولك كده لأن الرئيس الأوكراني زيلينسكي تراجع عن موقفه اللي كان بيصمم عليه دائما .. وأعلن عن مقترح لخطة سلام مع روسيا .. لكن المقترح ده معجبش روسيا ورفضته .. لكن رغم الرفض ده .. الإعلان نفسه عن الخطة بيقول إن الدنيا ممكن تتحرك الفترة الجاية والطرفين يقعدوا على طرابيزة المفاوضات تاني وينهوا الحرب .. طب إيه المقترح اللي أعلنه زيلينسكي ؟
زيلينسكي قال إنه علشان يقعد مع روسيا ويوقعوا اتفاق سلام لازم روسيا تسحب قواتها بشكل كامل من أوكرانيا .. وإن أوكرانيا مش هتقدمم أي تنازلات لروسيا .. ولازم يكون في ضمان لأمن أوكرانيا ووحدة أراضيها. طبعا روسيا كان لازم تعلق على الكلام ده .. وفعلا الكرملين طلع بيان أعلن فيه رفض خطة السلام دي .. وإن الشروط دي هتكون 3 خطوات في اتجاه استمرار الحرب مش نهايتها .. لأن أوكرانيا لازم تقبل الحقائق الجديدة اللي حصلت على أرض الواقع علشان روسيا تقبل التفاوض معاها ويتحقق السلام. المحللين السياسيين بردو شايفين إن العرض الأوكراني غير واقعي .. وفيه شروط مش بتعكس توازن القوى بين موسكو وكييف على أرض الواقع .. رغم التقدم الميداني للقوات الأوكرانية في مناطق معينة زي خيرسون مثلا .. لكن في النهاية الروس هما الأقوى بمختلف المقاييس العسكرية والاستراتيجية. على الناحية التانية في ناس بردو بتقول إن الطرفين لازم يقعدوا مع بعض حتى لو كانت روسيا هى الأقوى لكنها بردو مقدرتش تحقق أهدافها من الحرب دي لغاية دلوقتي رغم مرور سنة على الحرب .. بل العكس بتخسر مناطق كل شوية كانت كسبتها في البداية.

كمان المحللين شايفين إنه مجرد عودة زيلينسكي للكلام عن الحوار والتفاوض ده يعتبر طريق لإنهاء الصراع في أوكرانيا .. ومؤشر إيجابي بغض النظر عن تفاصيل المقترح بتاعه .. لأن الطرفين الروسي والأوكراني مفيش بديل قدامهم غير الحلول السلمية والدبلوماسية. الأستاذ بكلية الاستشراق بمدرسة موسكو العليا للاقتصاد رامي القليوبي قال إن خطة زيلينسكي للسلام فيها بعض المقترحات الواقعية زي المتعلقة بالأمن النووي والإشعاعي وأمن الطاقة والغذاء .. لكن فيها بردو شروط تعجيزية زي استعادة الأراضي الأوكرانية اللي ضمتها روسيا بما فيها شبه جزيرة القرم وسحب القوات الروسية من أوكرانيا قبل نهاية السنة .. وده أكيد مش هتوافق عليه روسيا. وقال في تصريحات مع موقع “سكاي نيوز عربية” .. إن المطالب دي غير واقعية وغير قابلة للتنفيذ عمليا وبالذات الانسحاب من شبه جزيرة القرم وسحب القوات الروسية .. لأنه مش معقول روسيا تخوض حرب داخلة دلوقتي علىسنة وفي الآخر تنسحب كده بكل سهولة. وعلشان كده نجاح الخطة دي معدوم تماما .. لكن بعد كده في مرحلة تانية ممكن بقى يتوصلوا لحلول وسط زي مثلا اعتراف أوكرانيا ضمنيا بسيادة روسيا على إقليم دونباس اللي هما “لوغانسك ودونيتسك شرق أوكرانيا” .. مقابل تخلي الروس عن بعض المناطق في خيرسون وزابوروجيا جنوب أوكرانيا

أما الكاتب والخبير في الشؤون الروسية بسام البني قال إن خطة زيلينسكي دي اتولدت ميتة .. لأنه بيطالب باسترجاع الأراضي الأوكرانية .. وده مطلب مرفوض كليا من الروس اللي يعتبرونها أراض روسية. وقال كمان إن الموضوع أكبر من أوكرانيا وشروط موسكو لإنهاء النزاع ده معروفة للجميع .. والعالم كله عارف إن صلب الخلاف متعلق بالضمانات الأمنية اللي بتطالب بيها موسكو من الغرب وحلف الناتو .. وأهمها سحب المنظومات الصاروخية الأطلسية اللي تم نشرها بعد سنة 1997 في بلاد أوروبا الشرقية .. ووقف نشر جنود الناتو في بعض الدول زي بولندا .. لأنه مش معقول إن روسيا تقبل بوجود الناتو بالشكل ده على حدودها. طبعا من الكلام اللي فات ده نقدر نقول إننا إن شاء الله داخلين على فترة ممكن تكون فيها نهاية للحرب دي .. لكن أكيد مش هتكون بالشروط اللي عاوزها الرئيس الأوكراني .. لأنها أكيد شروط عبيطة وروسيا استحالة تقبل بيها .. لكن مجرد إنه عاوز يقعد على الطرابيزة ويتفاوض يبقى أكيد هنشوف حاجة قريب برعاية دولة عظمى سواء أمريكا أو بريطانيا أو الصين. لسه مكملين مع أوكرانيا لكن المرة دي هنتكلم عن مؤتمر باريس اللي أوروبا يا عيني عمالة تلم فلوس من كل حتة علشان تساعد بيها سكان أوكرانيا في الشتاء الصعب اللي داخل عليهم خلال الأيام الجاية .. النهاردة فرنسا عملت مؤتمر شارك فيه 70 وفد من دول ومنظمات دولية بينهم كذا رئيس دولة وحكومة علشان تقدر تجمع مليار يورو تساعد بيه الشعب الأوكراني.

عرض المزيد