لقاء قادم بين ولي العهد السعودي محمد بن سلمان والرئيس الإيراني في الاردن ومفاجات كبيرة

ديسمبر 28, 2022


لقاء محتمل بين ولي العهد السعودي والرئيس الإيراني
مطالب السعودية هتتركز حوالين الحرب في اليمن
طلبات إيران هتكون فتح السفارات
هنري كيسنجر يكشف حل الأزمة الروسية الأوكرانية
أوروبا وأمريكا مش هيسيبوا أوكرانيا تغرق أبدا الفترة الجاية حتى لو كلفهم ده زيادة الدعم العسكري ليها

عودة العلاقات

الخبر اللي جاي ده مهم جدا لأنه بيفهمك الغرب بيفكر إزاي حوالين الحرب الروسية الأوكرانية .. النهاردة الأمين العام لحلف “الناتو” ينس ستولتنبرغ .. بيقولك إن الحرب بتاعت أوكرانيا وروسيا دي ممكن تستمر لفترة طويلة .. لكنها هتخلص في النهاية على طاولة المفاوضات .. وعلشان كده الغرب لازم يزود الدعم العسكري لأوكرانيا. ستولتنبرغ بيقول بردو إننا مش لازم نستهين بروسيا .. لأنها بتخطط لحرب طويلة المدى .. ولازم نفهم إن الرئيس فلاديمير بوتين مستعد لخوض الحرب دي لفترة طويلة وشن هجمات جديدة. كمان بيقول إحنا عارفين إنه مهما طالبت الحرب دي لازم هتنتهي على طاولة المفاوضات .. وعلشان كده لازم يكون انتصار أوكرانيا كدولة مستقلة وذات سيادة .. موجود في أي حل للأزمة دي. وقال كمان إن أسرع طريقة لتحقيق ده هو تقديم الدعم العسكري لأوكرانيا .. علشان الرئيس الروسي يفهم إنه مش هيقدر ينتصر في أرض المعركة طول ما الدعم الغربي موجود .. وإنه لازم ينسى الحرب ويقعد معانا على طرابيزة المفاوضات ويتفاوض بحسن نية. طبعا الكلام ده بيقولك إن أوروبا وأمريكا مش هيسيبوا أوكرانيا تغرق أبدا الفترة الجاية حتى لو كلفهم ده زيادة الدعم العسكري ليها .. لأن الدعم العسكري هو اللي هيخليها صامدة قدام روسيا .. وعلشان كده هيستمروا في تزويدها بالسلاح لغاية ما الأمور تمشي في اتجاه المفاوضات ويقعد الطرفين على الطرابيزة ويعملوا اتفاق سلام بينهم .. وخد بالك من نقطة مهمة قالها وهى إن أي حل لازم يكون فيه انتصار لأوكرانيا باعتبارها دولة مستقلة ذات سيادة.

نيجي بقى دلوقتي على المقال اللي كتبته الداهية السياسية هنري كيسنجر وزير الخارجية الأمريكي الأسبق عن رؤيته لحل الأزمة الروسية الأوكرانية واللي كتبته في صحيفة The Spectator .. طب قال إيه الداهية ده؟ قالك بصوا بقى لو عاوزين تحلوا الأزمة بتاعت روسيا وأوكرانيا دي لازم تتعلموا من درس الحرب العالمية الأولي واللي حصل فيها من موت وإصابة ملايين الضحايا .. وادمرت فيها مدن أوروبية كتيرة .. واختفت بسببها الدولة النمساوية المجرية من على الخريطة .. وضحت بريطانيا بنصيب كبير من جيلها الشاب وقتها وبقدراتها الاقتصادية علشان تحقق النصر .. غير إن ألمانيا اتدمرت وغيرها .. طب عاوز إيه يا عم كسنجر ؟ قالك الحل الوحيد للأزمة دي هو إن العالم يلحق نفسه بدري بدري من دلوقتي ويستغل فترة الشتاء الجاي اللي العمليات العسكرية تقريبا هتقف فيه .. ويبدأ يشتغل على الجهود الدبلوماسية والمافوضات علشان يحل الأزمة .. وبيقولك أنا قولت قبل كده إني داعم للجهود العسكرية اللي بيقوم بيها الغرب لإحباط العدوان الروسي على أوكرانيا .. لكن الوقت دلوقتي مناسب للبناء على التغييرات الاستراتيجية اللي تم تحقيقها بالفعل .. ودمجها في هيكل جديد نحو تحقيق السلام من خلال المفاوضات. كيسنجر بيقول إن أوكرانيا دلوقتي بقت دولة رئيسية في وسط أوروبا لأول مرة في التاريخ الحديث .. وبمساعدة حلفائها وبإلهام من رئيسها فلاديمير زيلينسكي .. أحبطت أوكرانيا القوات التقليدية الروسية اللي كانت تخيم على أوروبا منذ الحرب العالمية الثانية.

نخش علي السعودية و ايران المفروض إنه في قمة إقليمية هتتعمل في الأردن يوم 20 ديسمبر علشان تناقش الأزمة العراقية .. ودي قمة برعاية فرنسا وهيحضرها عدد من الدول زي السعودية وتركيا وإيران وغيرهم .. لكن المهم فيها إن وسائل إعلام لبنانية قالت إنه في خلال القمة دي ممكن يحصل لقاء محتمل بين ولي العهد السعودي الأمير محمد بن سلمان والرئيس الإيراني إبراهيم رئيسي علشان يناقشوا فيها إمكانية عودة المفاوضات مرة تانية بعد توقفها. مصادر مسئولة ومطلعة على أجواء المباحثات بين السعودية وإيران قالت لموقع “النشرة اللبنانية” .. إنه ممكن يحصل لقاء بين الزعيمين في الأردن علشان يتكلموا في عودة المفاوضات تاني لأن اللقاءات الثلاثة اللي اتعملت قبل كده بين طهران والرياض في بغداد ما وصلتش لنتائج ملموسة. المصادر بتقول إن مطالب السعودية هتتركز حوالين الحرب في اليمن كمدخل لفتح صفحة جديدة بين الطرفين .. لكن طلبات إيران هتكون فتح السفارات من تاني بين البلدين .. والمباحثات مش هتزيد عن كده مؤقتا .. لأن كان في كلام عن بيتقال عن حسم مصير ملف الرئاسة اللبنانية في القمة دي .. لكن المصادر بتقول إن النقاش أو المفاوضات بين السعودية وإيران مش هتوصل للملف اللبناني. طبعا إحنا كنا دائما بنجيب لكم أخبار الفترة اللي فاتت عن اقتراب عودة المفاوضات بين المملكة العربية السعودية وإيران .. وإنها ممكن تحصل في أقرب فرصة ممكنة .. وغالبا الفرصة دي هتكون قمة الأردن بخصوص العراق.

عرض المزيد