نفوذ دول الخليج مثل السعودية و الامارات وقطر اصبح محل قلق للاتحاد الاوربي وامريكا تراقب الموقف

ديسمبر 28, 2022


قطر تلوح بورقة الغاز ضد تحقيقات البرلمان الأوروبي بسبب اتهامها بالرشوة .. أوكرانيا تسقط 9 طيارات مسيرة وروسيا تتقدم في دونيتسك .. بريطانيا تراجع حساباتها في الحرب الروسية الأوكرانية

تطورات جديدة في الحرب الروسية الأوكرانية

النهاردة حصلت تطورات جديدة في الحرب الروسية الأوكرانية .. أوكرانيا أعلنت عن إسقاطها 9 طيارات مسيرة روسية كانت فوق العاصمة الأوكرانية كييف .. وعلى الناحية التانية روسيا بتقول إنها أحرزت تقدم في دونيتسك شرق أوكرانيا.القوات العسكرية الأوكرانية بتقول إنها أسقطت 9 طيارات إيرانية من ظراز شاهد أثناء تحليقها في المجال الجوي للعاصمة كييف .. وده اللي خلا الناس تسمع صوت انفجارات قوية في المدينة وفي المنطقة المحيطة بالعاصمة.
أوكرانيا بتقول بردو إن روسيا بقت بتهاجم العاصمة بعدد كبيرة من الطيارات المسيرة .. وده خلا جهاز الحماية المدنية في كييف يطلق إنذار بالغارات .. وضرورة الاحتماء في الملاجئ .. لدرجة إن جالة التأهب دي استمرت 3 ساعات.
طبعا روسيا عمالة تهاجم العاصمة الأوكرانية وغيرها من المدن علشان تدمر البنية التحتية لمحطات الطاقة الأوكرانية .. اللي تقريبا دلوقتي بتعاني أشد المعاناة .. وكل يوم الكهرباء بتقطع عن ملايين الأوكرانين بالساعات. على الناحية التانية بقى وزارة الدفاع الروسية بتقول إنها حققت تقدم على محور دونيتسك شرق أوكرانيا .. وإن قواتها سيطرت على قرية اسمها ياكوفليفكا في دونيتسك .. وانتهت من تطهيرها من فلول الجيش الأوكراني .. وكانت حصيلة قتلى الجيش الأوكراني في العملية دي أكتر من 40 جندي.ده طبعا غير مقتل 175 مسلح أوكراني خلال الـ 24 ساعة اللي فاتت في كذا منطقة .. وتدمير مركز قيادة أوكراني في منطقة كراسني ليمان ونظام رادار متنقل أميركي الصنع في دونيتسك. طبعا أوكرانيا وأوروبا كلها متجننة دلوقتي من إيران وهتفرقع من الغيظ بسبب دعمها لروسيا بالطيارات المسيرة .. رغم إنها كل شوية تطلع تقول إنها مش بتزود روسيا بطيارات .. لكن الكلام ده على أرض الواقع مش صحيح .. لأن كل يوم والتاني تقع طيارات من طراز شاهد في أوكرانيا.

من يومين رئيس الوزراء البريطاني ريشي سوناك طلب حاجة خوفت المسئولين في الحكومة البريطانية شوية حوالين مصير الحرب الروسية الأوكرانية .. طب إيه هي ؟ رئيس الوزراء البريطاني طلب من الحكومة إنها تعمل تقييم لمدى التقدم في الحرب من ساعة ما بدأت لغاية دلوقتي .. علشان يعرف هل الأسلحة البريطانية اللي بتاخدها أوكرانيا ليها فائدة في الحرب ولا لأ .. وهل يستمر في تقديم الدعم لأوكرانيا الفترة الجاية ولا لأ . مصدر قال لشبكة بي بي سي إن سوناك طلب معلومات عن أهمية الإمدادات العسكرية البريطانية في الحرب علشان ممكن بريطانيا تاخد نهج واتجاه جديد ممكن يكون حذر شوية عن اللي موجود دلوقتي. طبعا إحنا هنا لازم نعرف إن بريطانيا تعتبر من أهم موردي المساعدات العسكرية لأوكرانيا في الحرب دي من أول ما بدأت .. وكمان بتدرب على أراضيها عسكريين أوكرانيين .. ورئيس الوزراء نفسه زارها الشهر اللي فات في أول زيارة خارجية ليه بعد تعيينه في المنصب وقال وقتها إن بلده كانت مع أوكرانيا طوال الطريق.لكن الطلب الأخير ده من سوناك “أثار جرس إنذار” عند المسئولين في الحكومة البريطانية لأنه ممكن يكون تمهيد لتغيير نهج بريطانيا من دعم أوكرانيا .. وبالذات بعد ما بقى القادة العسكريين بيقولوا إن إمدادات الأسلحة البريطانية إلى أوكرانيا ممكن تكون حاسمة في الشهور الجاية. بي بي سي بتقول بردو إن الرئيس الأوكراني فولوديمير زيلينسكي على دراية بالجدل اللي بيحصل دلوقتي جوه بريطانيا وعلشان كده بيحاول يضغط على رئيس الوزراء سوناك للحفاظ على تقديم الدعم العسكري القوي لبلده.

هنا لازم نعرف إن طلب التقييم ده جاي في وقت حساس جدا من الصراع الروسي الأوكراني ده .. طب ليه .. لأن في شخصيات رئيسية في الحكومة البريطانية شايفة إن القتال بين روسيا وأوكرانيا وصل إلى طريق مسدود .. لدرجة إن رئيس هيئة الدفاع الأدميرال توني رادكين قال الكلام ده بس بطريقة دبلوماسية شوية في ندوة الأسبوع اللي فات .. وقال إن مخزونات الجيش الروسي دلوقتي بقت فاضية .. وكأنه بيقول لحكومته والدول الأوروبية يلا دلوقتي لازم نزود أوكرانيا بالدعم والأسلحة اللازمة علشان تكسب الصراع ده. لأن هى دي الطريقة الوحيدة اللي ممكن تكسب بيها أوكرانيا الحرب .. علشان مخازن روسيا خلصت فعلا .. وأوكرانيا مش هتقدر تساعد نفسها بنفسها في الوقت الحالي .. إلا بمساعدة الولايات المتحدة والقوى العسكرية الرئيسية في أوروبا بقيادة بريطانيا. ولوتفتكروا أوكرانيا الأسبوع اللي فات طالبت أوروبا والغرب إنهم يدعموها بالمزيد من الأسلحة .. لدرجة إن الجنرال فاليري زالوجني قائد القوات المسلحة الاوكرانية قال في تصريحات لمجلة إيكونوميست .. إنه يقدر يكسب روسيا لكن ده مش هيحصل لإني محتاج 300 دبابة و600 إلى 700 آلية قتال للمشاة و500 مدفع هاوتزر .. على الأقل.

عرض المزيد