السيسي يقوم بعملية كبيرة تغير وجة مصر وتفتح الطريق الي خير كبير للشعب المصري

ديسمبر 28, 2022


ضربة معلم مكاسب مصر من ترسيم الحدود البحرية الغربية مع ليبيا .. تعديلات جديدة في مبادرة استيراد السيارات للمصريين بالخارج .. ما سبب تمسك صندوق النقد بتعويم الجنيه

ضربة معلم

من يومين كده مصر طلعت قرار مفاجئ كده محدش خد باله منه أو ركز معاه لكنه عمل قلق جامد وهيكون ليه فوائد مهولة لمصر وهيمنع عنها الأطماع الخارجية لبعض الدول .. طب إيه هو القرار ده .. القرار هو ترسيم الحدود البحرية الغربية لمصر في البحر المتوسط . طب القرار ده معناه إيه .. وهل النزاع في البحر المتوسط هيتوقف؟ القرار ده معناه حسم مصر لحدودها البحرية اللي ممكن من خلالها إنها تطرح المناطق اللي في الحدود دي قدام شركات النفط العالمية للتنقيب عن النفط والغاز .. وهتحافظ بيه على ثروات الغاز في منطقة البحر المتوسط التابعة ليها والي فيها ثروات من الغاز بمليارات الدولارات .. ومعناه بردو إعداد وتجهيز المناطق اللي جوه الحدود دي للبحث عن النفط والغاز ووقف أي أطماع فيها. وزير البترول المصري السابق أسامة كمال .. قال في تقرير عمله موقع “العربية” .. إن منطقة شرق المتوسط ليها أولوية كبرى في اهتمامات شركات النفط العالمية .. بسبب احتياطيات الغاز الضخمة اللي موجودة فيها .. وعلشان كده ترسيم الحدود البحرية الغربية دي هيحسم عمليات طرح المناطق دي ومياهها العميقة للتنقيب للوصول للثروات .. والحفاظ على حق كل دولة في ثرواتها الطبيعية وفقا لاتفاقية الأمم المتحدة سنة 1982. طب ليه مصر طلعت القرار ده دلوقتي؟ وزير البترول بيقول إنه مع المناوشات الأخيرة من جانب تركيا في ليبيا والكلام المتكرر عن الحدود البحرية ليهم مع بعض .. كان لازم مصر تحسم حدودها مع ليبيا زي ما عملت في حدود البحر الأحمر وشرق المتوسط قبل كده .. وأكد في النقطة دي على إن ترسيم الحدود ده ليه أصول قانونية وجغرافية .. زي مثلا وضع نقاط كل 5 كيلومترات .. والمفترض أن لكل دولة 200 ميل بحري من أول نقطة أساس بحرية .. وبعدها تبدأ الدول في رسم حدودها.

الوزير بيقول إن القرار هيخلي مصر قادرة على طرح المناطق دي قدام الشركات العالمية .. وبالذات إن بعض الشركات كانت خايفة وبترفض التنقيب في المناطق دي .. بحجة إن الحدود مش معروفة أو واضحة أو عليها نزاعات .. لكن دلوقتي الأمر اتحسم وكل واحد بقى عارف حدوده فين .. وبقى معروف إن المناطق دي مصرية وبتخضع للسيادة المصرية .. ولينا فيها حق الصيد والبحث عن الثروات .. وهو ده المكسب الأهم والأكبر لمصر .. في ظل اللغط الأخير اللي كان موجود وقت توقيع الاتفاق البحري بين تركيا وليبيا. مش بس كده .. ده كمان هيجذب الشركات العالمية لضخ استثماراتها في البحر المتوسط وزيادة الاستثمارات والأعمال اللي موجودة دلوقتي .. ووضع مناطق جديدة على خريطة البحث والاستكشاف. أما وكيل لجنة الدفاع والأمن القومي في مجلس النواب .. أحمد يحيى .. بيقول إن قرار ترسيم الحدود ده حتى لو من جانب واحد وليبيا زعلانة منه .. لكنه قرار صحيح من الناحية الاستيراتيجية .. علشان بيحافظ على ثروات وحقوق مصر في غاز البحر المتوسط .. وبالذات بعد إعلان بعض الشركات عن ظهور حقول ضخمة للغاز داخل المياه المصرية الإقليمية. كمان بيقول إن الترسيم ده هيخلي البلد تشتغل في التنقيب والبحث من غير أي عوائق تقف قدامها أو مناوشات من أي دولة تانية ووقف أطماع أي حد عاوز ياخد غاز البحر المتوسط. طبعا قرار ترسيمن الحدود البحرية الغربية ده يعتبر ضربة معلم من مصر .. لأن تركيا كانت عملت اتفاقية مع ليبيا علشان تستكشف النفط والغاز في مياهها .. ودي خلتها تحط عينها على الثروات في البحر المتوسط .. وأكيد مصر مكنتش هتسمي عليها وتسيبها تعمل اللي هى عاوزاه كده ببساطة . لو تفتكروا لما تم الإعلان قبل كده عن شروط مبادرة استيراد المصريين في الخارج السيارات بدون جمارك ورسوم .. ناس كتير اتكلمت عن المشاكل اللي في المبادرة دي وإنها مش هتحقق المطلوب منها .. علشان الشروط صعبة شوية ومش هتخلي الناس تقبل عليها .. النهاردة بقى الحكومة استجابت للناس وعدلت بعض الشروط بتاعت المبادرة .. طب إيه التفاصيل ؟

التعديلات على المبادرة كانت في 4 بنود .. أولها إنه تم إلغاء شرط توثيق كشف الحساب من السفارة ووزارة الخارجية .. وكمان إلغاء توثيق الإقامة من جانب المصريين العاملين بالخارج .. وشرط وجود مبلغ الوديعة في الحساب قبل دخول السيارة بـ3 شهور .. كمان تم تعديل قيمة الوديعة وبقت 3 فئات بدل فئة واحدة. مدير عام جمارك السيارات أحمد أبوبكر .. قال بعد الإعلان عن التعديلات دي إنه إجمالي الضرائب والرسوم المستحقة على السيارة هتختلف طبقا للفئة والطراز والموديل والسعة اللترية. وأكد إن اتفاقية الشراكة المصرية الأوروبية اللي بتسمح باستيراد السيارات بدون جمارك مدخلتش ضمن تعديلات لائحة المبادرة الجديدة .. علشان الاتفاقية دي بتخضع لبروتوكولات وشروط الاتفاقيات الدولية وعلشان كمان نحافظ على صناعة وتجارة السيارات في مصر. وقال إننا لو طبقنا اتفاقية الشراكة المصرية الأوروبية على المقيمين بره أوروبا هنلاقي الناس كلها هتروح على استيراد السيارات الأوروبية والاستفادة من الإعفاء المقرر على المبادرة للضرائب والرسوم الجمركية .. وده معناه انخفاض الحصيلة. مدير عام الجمارك بيقولك إنه لغاية دلوقتي تم تسجيل 26 ألف طلب من المصريين المقيمين بالخارج علشان يستفيدوا من المبادرة خلال أول 15 يوم من التطبيق .. وحوالي 2700 منهم خدوا إذن دفع بإجمالي 42 مليون دولار .. وبيقول إنه بعد الموافقة على التعديلات العدد ده هيتتضاعف. من ساعة ما صندوق النقد الدولي وافق على القرض لمصر بقيمة 3 مليار دولار والناس كلها عمالة تسأل وتقول هل هيحصل تعويم تاني ولا لأ .. وليه الصندوق متمسك أوي بموضوع تعويم الجنيه ده . السؤال الأولاني إحنا جاوبنا عليه في حلقة إمبارح .. إنما ليه الصندوق متمسك بالتعويم ده اللي هنعرفه النهاردة .. الصندوق بيقول إن مرونة سعر الصرف أو اللي بيتقال عليه تعويم الجنيه ده .. حاجة مهمة جدا لمصر .. طب ليه .. بيقولك علشان نظام ثبات السعر اللي حصل طول السنين اللي فاتت مصر ما استفادتش منه بحاجة.

عرض المزيد