السعودية و الامارات ينقذوا الشعب الاوكراني | حل البرلمان الاوربي | قطر تدعم بوتين في الحرب

ديسمبر 28, 2022


قطر تقدم خدمة العمر لروسيا ضد أوروبا .. ورئيس وزراء المجر يطالب بحل البرلمان الأوروبي بعد فضية الرشوة .. الإمارات ترسل مساعدات جديدة لأوكرانيا لمواجهة الشتاء

قطر وقضية الرشوة

طبعا كلنا عارفين اللي حصل في البرلمان الأوروبي والكلام اللي بيتقال عن إن قطر كانت عاوزة تشتري النفوذ داخل البرلمان عن طريق رشوة عدد من النواب .. لكن تم الكشف عن القضية والاعلان عنها على الرأي العام .. وده اللي خلا قطر ترد على الكلام ده وتنفيه نفي تام .. لدرجة أن الأمر وصل إلى تهديد قطر بمنع الغاز بتاعها عن أوروبا .. وده طبعا هيكون في مصلحة روسيا بشكل كبير .. لأن أوروبا حاطة أملها كله دلوقتي على دول زي قطر ومصر والجزائر علشان تعوض الغاز الروسي اللي عليه عقوبات كتيرة ووضعت له سقف سعر قريب .. وده طبعا هيخلي روسيا ما تصدرش الغاز بتاعها لاوروبا. هنا بقى الكاتب غيفورغ ميرزايان كتب مقال في صحيفة “فزغلياد” حوالين الخدمة اللي هتدمها قطر لروسيا بطريقة ردها على أوروبا اللي بتتهمها بشراء الذمم في البرلمان الاوروبي. الكاتب بيقولك إن أوروبا لقت نفسها فجأة في صراع مع قطر .. اللي المفروض حاطة امل عليها انها تعوض الغاز الروسي في الفترة الجاية .. ومكنتش عارفة تعمل ايه .. لأنه مش هينفع يتستروا على فضيحة الفساد دي وكان لازم يعلنوا عنها .. علشان لو القضية اتعرف تفاصيلها بعد كده هتبقى مشكلة للزعماء الاوروبيين .. لأن الناخبين مش هينتخبوهم تاني في أي انتخابات .. وكمان أوروبا دائما بتقول انها بلاد الشفافية ومفيش فساد عندها وبتكافح بإصرار اي رشوة للنواب عندها .. يبقى ازاي هتتستر على حاجة زي كده . وعلشان كده أوروبا دلوقتي في صراع مع قطر وجها لوجه .. وبتاخد قرارات قوية ضدها آخرها كان منع ممثلي قطر رسميًا من دخول مبنى البرلمان الأوروبي.

هنا بقى يجي سؤال مهم .. هل قطر فعلا عاوزة تعاقب الاتحاد الاوروبي بالغاز وهتمنعه عنه .. ولو عملت كده هتمنعه لغاية امتى .. الكاتب بقى بيقول في النقطة دي أن قطر مش مهم تنفذ التهديدات بتاعتها فعلا .. لكن ممكن تتحجج لاوروبا بأنها عندها عقود طويلة الأجل مع دول آسيوية تانية .. وساعتها تقولهم للاسف مش هقدر ابعتلكم غاز لغاية ما اخلص العقود دي .. وهنا تكون قطر لعبتها صح ونفذت تهديداتها بشكل دبلوماسي مفيهوش اي حاجة تعملها مشكلة مع الغرب بعد كده .. وبكده تكون عملت اكبر خدمة لروسيا .. لأن أوروبا مش هتلاقي حد يبعتلها غاز .. وهتضطر ترجع لروسيا تاني وتطلب منها غاز علشان تشغل مصانعها وبيوتها بالكهرباء والطاقة . كمان خبيرة المجلس الروسي للشؤون الدولية إيلينا سوبونينا .. قالت في النقطة دي أنها اتكلمت مع ممثلين رفيعي المستوى في صناعة النفط والغاز القطرية .. وبعد كلامي معاهم اقدر اقول إن قطر مش هتعوض أوروبا عن الغاز الروسي .. أو على الأقل الكميات اللي بيراهن عليها الاوروبيين وتكفيهم في الفترة الجاية .. لأن قطر وقعت اتفاقيات غاز طويلة الأجل مع دول آسيوية .. ومش هتقدر تقول للدول دي معلش مش هبعتلكم غاز علشان خاطر أوروبا محتاجاه .. وعلشان كده الأولوية عند قطر هتكون للدول الآسيوية دي مش أوروبا.

لسه مكملين مع فضيحة فساد البرلمان الاوروبي.. لكن المرة دي مع رئيس وزراء دولة المجر فيكتور اوربان .. اللي بيطالب بحل البرلمان ده بعد فضيحة الرشوة. مش بس كده .. ده كمان وصف الفضيحة دي أنها الاسوأ عبر التاريخ .. وقال كده بالنص “نحن نطالب بحل البرلمان الأوروبي ومراجعة قواعد انتخابات هذا البرلمان”. وقال إنه لازم يتم انتخاب البرلمانيين الأوروبيين من جانب نواب البرلمانات الوطنية في دول الاتحاد الأوروبي مش من الناخبين مباشرة.
طبعا الكلام ده بيحصل في الوقت اللي السلطات البلجيكية مستمرة في التحقيقات اللي بتعملها حوالين القضية .. واللي كان آخرها تجميد اموال عدد من النواب المتورطين في القضية .. والقبض عليهم واعتقالهم .على الناحية التانية .. قطر لسه عند رأيها بأنها بترفض وتدين الادعاءات المزعومة دي لانها مضللة وخطيرة. ومن قطر نروح للإمارات اللي أعلنت النهاردة عن إرسالها لمساعدات جديدة لأوكرانيا ضمن المساعدات المستمرة اللي بدأتها قبل كده هى والمملكة العربية السعودية وكان آخرها مساعدات بملايين الدولارات .. الجديد بقى النهاردة إن الإمارات بعتت لأوكرانيا 2500 مولد كهربائي منزلي لدعم المدنيين في مواجهة ظروف الشتاء القاسي وانقطاعات التيار الكهربائي.

عرض المزيد