السعودية توقع اتفاق امني مع امريكا غير مسبوق بن سلمان بيلعبها صح

ديسمبر 31, 2022


رغم التوتر في العلاقات .. اتفاق أمني سري بين السعودية والولايات المتحدة .. لأول مرة في تاريخها المملكة تستعد لإطلاق استراتيجية عسكرية ودفاع وطني .. الجيش الإسرائيلي يحبط مخطط إيراني في هضبة الجولان

اتفاق أمني سري بين السعودية والولايات المتحدة

طبعا إحنا شايفين التوتر الكبير في العلاقات السعودية الأمريكية في الفترة اللي فاتت من ساعة قرار خفض إنتاج النفط من أوبك والمملكة العربية السعودية .. لكن هل يا ترى العلاقات بين البلدين والاجتماعات مع المسئولين وبعضهم البعض وقفت أو انتهت .. لأ طبعا .. حتى لو قولنا إن في توتر في العلاقات لكن أكيد لازم يحصل اجتماعات بين المسئولين في البلدين وبالذات المسئولين الأمنيين أو العسكريين .. وهو ده اللي كشف عنه جنرال أمريكي كبير لموقع “المونيتور” الأمريكي .. طب مين هو الجنرال ده وقال إيه بالظبط ؟ . الجنرال ده هو مايكل إريك كوريلا .. القائد الأعلى للقوات الأمريكية في الشرق الأوسط .. وده يعتبر تالت واحد في ترتيب القادة في وزارة الدفاع الأمريكية البنتاجون .. يعني مش أي حد اللي بيتكلم .. طب قال إيه بقى .. بيقولك إن المسئولين العسكريين الأمريكيين شغالين بقالهم فترة من ورا الكواليس مع المسئولين السعوديين علشان يساعدوهم في وضع رؤية طويلة الأجل للأمن القومي للمملكة. الجنرال الأمريكي بيقول لموقع”Al-Monitor” إن المملكة العربية السعودية بتستعد دلوقتي لإطلاق استراتيجية دفاع وطني واستراتيجية عسكرية وطنية السنة الجاية لأول مرة في تاريخها .. وبيقول إن السعوديين مهتمين جدا بالتعاون معانا في وضع الخطط الاستراتيجية دي .. حتى مع توتر العلاقات بين الحكومتين.

كمان بيقول إن المخططين الاستراتيجيين الأمريكان بيروحوا السعودية بانتظام علشان يجتمعوا مع القادة العسكريين السعوديين .. ويحطوا معاهم أفكارهم الخاصة برؤية استراتيجية طويلة المدى للدفاع الوطني والعسكري السعودي .
مش بس كده ده بيقولنا كمان إن وثائق الاستراتيجية دي متمش الإعلان عنها لغاية دلوقتي لكن ممكن يعلنوا عنها خلال الأيام الجاية .. وهتكون بعنوان “رؤية المملكة الاستراتيجية للأمن القومي والأمن الإقليمي” .. ووصف القرار ده بإنه خطوة حاسمة في خطط التحديث العسكري لولي العهد الأمير محمد بن سلمان. ولو تفتكروا لما تم الإعلان عن قرار خفض إنتاج النفط .. أمريكا اتضايقت جدا من المملكة والبيت الأبيض اتكلم مع قيادات المملكة بشكل مش كويس وحصلت مشاكل بين المسئولين .. لكن ده معطلش الاجتماعات المنتظمة والتدريب الثنائي بين الجيشين السعودي والأمريكي .. والجنرال كولين كال نفسه كان أعلن في شهر مايو اللي فات دعمه الكامل لأهداف التحديث الدفاعي لولي العهد السعودي .. رغم وقف الرئيس الأمريكي بايدن مبيعات الأسلحة الهجومية للسعودية ودول مجلس التعاون الخليجي بعد فترة قليلة من توليه منصبه .. ردا على انتقادات سلوك جيوشها في حرب اليمن. صحيفة Al-Monitor في تقريرها بتقول إن كل ده بيحصل في الوقت اللي أحرج فيه ولي العهد محمد بن سلمان الرئيس بايدن علنا مرتين .. الأولى بقرار تخفيض إنتاج النفط .. والتانية بالترحيب الكبير بالزعيم الصيني شي جين بينغ خلال زيارته الأخيرة للمملكة.. واللي يعتبر أكبر خصم استراتيجي للولايات المتحدة.

لكن رغم كده كان المسؤولين العسكريين في القيادة المركزية الأمريكية شغالين بهدوء في حملة دبلوماسية لبناء تحالف دفاعي إقليمي غير رسمي .. تحالف يقدر يساعد المملكة العربية السعودية والإمارات العربية المتحدة على الدفاع بشكل أفضل ضد الهجمات الصاروخية اللي ممكن تشنها إيران عليهم .. مع تقليل اعتمادهم على الولايات المتحدة. المونيتور بتقول بردو إن قيادة الجنرال كوريلا شغالة في الاتجاه ده على بناء مجموعتين تجريبيتين إضافيتين .. فرقة العمل الجوية 99 وفرقة المهام التابعة للجيش 39 .. وده لإثبات الإمكانات اللي بتوفرها لكبار الضباط في الشرق الأوسط .. والإمكانات اللي بتوفرها التكنولوجيا المتاحة تجاريا والمرتبطة بالذكاء الاصطناعي .. خلو بالكم إن الحاجات دي كلها كانت بتحصل رغم توتر العلاقات. ومن ضمن الحاجات اللي اتناقشت بردو بين قائد القيادة المركزية الأمريكية وقائد القوات المسلحة الملكية السعودية .. الخطوات والخطط الخاصة باختبار أسلحة مضادة للطائرات بدون طيار .. وده كان في اجتماع الشهر اللي فات. طبعا إحنا دلوقتي بنسمع الكلام ده وأكيد بنضرب كف على كف .. إزاي الناس دي كانت مقطعة بعض في العلن وفي كل وسائل الإعلام .. وتهديدات من هنا وتهديدات من هناك .. وفي الآخر هما بيجتمعوا مع بعض وراء الكواليس علشان يعملوا اتفاق أمني سري ويحطوا أول استراتيجية للدفاع الوطني والعسكريفي تاريخ المملكة العربية السعودية . من هنا لازم نفهم إن مش كل اللي بنشوفه ونسمعه في وسائل الإعلام بيكون هو ده كل الحكاية .. لأ .. في حاجات بتحصل وراء الكواليس محدش يعرف عنها حاجة .. وهى دي اللي بتبقى أساس كل حاجة.

عرض المزيد