ما أسباب موقف الصين الغامض من الحرب الروسية الأوكرانية؟

ديسمبر 6, 2022


في سؤال مهم جدا ومحير ناس كتير جدا .. وهو الصين واقفة مع مين بالظبط في الحرب الروسية الأوكرانية اللي شغالة بقالها 9 شهور دلوقتي .. الناس كلها بتسأل هل الصين فعلا مع روسيا .. ولا هى في موقف محايد .. ولا إيه بالظبط

لغز موقف الصين

الحقيقة موقف الصين فيه لغز شوية .. علشان هى بترفض دعم غزو الروس لأوكرانيا من ناحية .. وفي نفس الوقت بترفض إدانتهم .. يعني إزاي رافض للحرب وفي نفس الوقت مش عاوز تدينها .. هو ده اللي بيخلي ناس كتيرة عاوزة تعرف موقف الصين بالظبط .. وليه قوة كبرى زيها ملتزمة الحياد في صراع خطير زي ده .. وهل هتقدر تحافظ على الموقف المحايد ده لفترة طويل .. ولا هتضطر إنها تتراجع عنه وتشترك في الصراع .. وهل لو اشتركت فيه هتكون مع مين .. روسيا ولا أوكرانيا .. علشان كده كل الخيارات قدام الصين مش حلوة طب موقف الصين من الصراع في أواكرانيا قبل الحرب كان إيه بالظبط ؟ الموقف بتاعها كان واضح جدا إنها مع الروس .. وإن الأزمة اللي هتحصل من صنع الغرب .. علشان هو اللي حشر الروس في منطقة ضيقة بإصراره غير المبرر على التوسع ناحية الشرق .. والاقتراب من الحدود الروسية من خلال حلف الناتو .. وقالت في تصريحات رسمية قبل اندلاع الحرب إن الولايات المتحدة عندها إصرار على إشعال الأوضاع بين روسيا وأوروبا.

بعد الموقف الرسمي ده .. كتير من الناس قال إن الصين هتقف مع روسيا لو الحرب قامت بينها وبين أوكرانيا .. لكن المفاجأة كانت إن الصين خدت موقف الحياد من ساعة ما بدأت الحرب لغاية دلوقتي .. ومش عاوزة تقف مع طرف ضد التاني .. وده ظهر جدا في مواقفها في الأمم المتحدة أو مجلس الأمن بخصوص الحرب .. وامتنعت عن التصويت ضد قرار إدانة غزو روسيا لأوكرانيا في مجلس الأمن .. ولما روسيا استخدمت حق الفيتو .. تم عرض القرار على الجمعية العامة للأمم المتحدة .. واستمرت الصين بردو في الموقف المحايد بتاعها .. مش بس كده .. ده كمان وزارة الخارجية الصينية قالت في بيان ليها إن الصين بتحترم سيادة كل دولة على أراضيها .. لكن في نفس الوقت تتفهم قلق روسيا المنطقي حول أمنهم القومي. طب ليه الصين واخدة الموقف الحيادي ده؟ الموقف ده ناتج عن كذا حاجة .. أولها إنها عاوزة تحافظ على العلاقة الخاصة جدا بينها وبين روسيا .. وتانيها إنها مش عاوزة علاقتها تتدهور مغ الغرب .. لأن مصالحها مع الغرب كبيرة جدا ..

تالتها إنها لو دعمت غزو روسيا لأوكرانيا .. ده هيعتبر تناقض لأهم مبادئ السياسة الخارجية الصينية وهو احترام سيادة الدول ووحدة أراضيها .. والمبدأ ده طبعا الصين بتحترمه مش علشان خاطر الدول التانية بس .. لكن علشان الغرب نفسه حاول كذا مرة إنه يفصل أجزاء من الصين عنها زي هونج كونج .. ولسه لغاية دلوقتي بيحاول إنه يفصل تايوان عنها .. وعلشان كده هى بتحافظ على الالتزام بالمبدأ ده علطول. طب الصين عاوزة تحافظ على علاقتها القوية جدا مع روسيا ليه ؟ علشان هى عارفة إن أي صراع هيحصل بينها وبين الغرب في السنين الجاية مش هتلاقي حد يقف معاها أكتر من روسيا .. وروسيا بردو نفس الكلام .. مش هتلاقي حد يقف معاها اكتر من الصين .. وعلشان كده العلاقة بينهم نقدر نقول عليها تحالف مش تعاون وبس .. كمان لو بصينا على التبادل التجاري بين البلدين هنلاقيه بيوصل لـ 140 مليار دولار في السنة.. وروسيا بتبيع للصين أهم سلعتين في العالم دلوقتي ومش هتقدر الصين تجيبهم من أي حد غيرها .. طب إيه هما ؟؟.. السلاح والطاقة سواء بترول أو غاز علشان تشغل مصانعها العملاقة .. لأن من غير طاقة الاقتصاد الصيني هيقع.

عرض المزيد