إزاي الصين أكبر دائن لأمريكا رغم إنهم أعداء

ديسمبر 5, 2022


يلا بينا نشوف في فيديو انهاردة ماذا يحدث لو طلبت الصين كل القروض التي منحتها لامريكا مرة واحدة هل تنهار امريكا ؟

القروض الصينية الامريكية

كلنا عارفين إن الولايات المتحدة إمبراطوية بتعيش على الديون .. ومنذ نشأتها وهى بتقترض علشان تعيش .. وديونها بلغت أرقام فلكية في السنين الأخيرة .. ورغم كده لسه دول العالم بتتسابق على إقراضها .. وعلى رأس الدول دي الصين نفسها .. منافستها وغريمتها دلوقتي في العالم .. ودي بيخلينا نطرح على نفسنا مجموعة من الأسئلة .. أهمها إمتى الولايات المتحدة هتسدد ديونها .. وهل الديون دي ممكن تؤدي إلى إنهيار أمريكا .. وإيه اللي ممكن يحصل لو الصين طالبت أمريكا بتسديد كل ديونها مرة واحدة .. لكن قبل ما نجاوب على الأسئلة دي .. في سؤال مهم لازم نعرفه وهو .. ديون الولايات المتحدة الأمريكية دي كام بالظبط؟
لغاية شهر فبراير اللي فات ديون أمريكا وصلت إلى 30 تريليون دولار .. 37% منها مفروض تتسدد خلال سنة .. و35% ما بين سنة و5 سنين .. والباقي مدته طويلة شوية .. شايفين حجم الرقم .. 30 تريليون دولار .

السؤال التاني المهم بردو .. أمريكا بتقترض منين؟
أمريكا بتقترض من الداخل والخارج مع بعض .. يعني من كل المصادر المتاحة قدامها .. وحوالي 70% من الديون مملوكة لمستثمرين أمريكان زي البنوك وصناديق الاستثمار والتأمينات الأمريكية .. و30 % لدول خارجية .. الصين لوحدها ليها فيهم حوالي 1.2 تريليون دولار .. يعن أمريكا مديونة للصين بتريليون و200 مليار دولار .. شايفين الرقم الضخم .
طب ليه كل الدول دي بتتسابق على إنها تقرض أمريكا؟
في أسباب كتيرة لكن أهمها هى إن أمريكا لسه لغاية دلوقتي بتعتبر أقوى اقتصاد في العالم .. وفي ثقة كبيرة في اقتصادها وحكومتها ومؤسساتها .. وكمان مفيش مرة شوفناها تعثرت عن سداد ديونها .. وبالتالي الفلوس عندها مضمونة .. واحتمالات ضعف الاقتصاد الأمريكي في السنين الجاية قليلة .. وإن كانت موجودة الأيام دي في آراء بعض الخبراء الاقتصاديين .. لكن بردو رغم كده .. الضعف ده مش معناه الانهيار .. معناه إن الصين ممكن تبقى أقوى منها أه .. لكن بردو أمريكا هتفضل زي ما هى قوية.
السؤال الأهم بقى .. ليه الصين اللي بتعتبر غريمة ومنافسة أمريكا بتقرضها كل الفلوس دي .. مع إن المفروض ما تساعدهاش علشان تبقى هى اللي بتقود العالم؟
السبب الأول هو رغبتها في استثمار الفوائض المالية اللي عندها في أذون وسندات الخزانة الأمريكية الآمنة .. زيها زي أي دولة تانية عندها فوائض مالية .. زي السعودية مثلا .. طب السندات دي آمنة ليه .. آمنة علشان هى بالدولار اللي يعتبر أقوى عملة في العالم .. والعملة الرئيسية في التجارة العالمية .

السبب التاني هو إن الصين حريصة على الاستثمار في الدولار علشان يبقى عندها احتياطات كبيرة منه وتحافظ على قوة عملتها المحلية اليوان في وقت الأزمات الاقتصادية العالمية .
السبب التالت هو ظروف الصين الخاصة اللي قائمة على التصدير لكل دول العالم تقريبا .. وبالتالي هى محتاجة إلى التعامل بالدولار لأنه العملة الأهم في التجارة العالمية .. وعلشان تزود صادراتها لازم تخلي عملتها أرخص من الدولار .. علشان البضائع بتاعتها تبقى رخيصة لكل الدول .. وبالتالي لازم تستثمر الفوائض المالية بتاعتها في أمريكا علشان الدولار يفضل زي ما هو قوي قدام اليوان.
طب النتيجة بتاعت الكلام ده إيه ؟
النتيجة هى إن الصين هتحافظ على صادراتها الكبيرة للولايات المتحدة الأمريكية .. لأن المواطن الأمريكية هيكون قادر يشتري المنتجات الصينية بالدولار القوي .. لكن المواطن الصيني مش هيكون قادر يشتري البضائع الأمريكية باليوان الضعيف .. وفي النهاية الصين تبقى المستفيد مش أمريكا .. لأن بضاعتها بتبقى أرخص .. وده هيعود بالنفع في النهاية على الاقتصاد الصيني بشكل عام
هنا بقى نيجي للسؤال اللي هييجي في بالكم كلكم دلوقتي .. إيه اللي ممكن يحصل لو الصين اتخلصت من كل ديونها للولايات المتحدة .. يعني بالبلدي كده تقول لأمريكا هاتي فلوسي اللي عندك؟
في النقطة دي لازم نفهم حاجة مهمة .. هى إن الصين لو طالبت أمريكا بديونها دلوقتي مش هيحصل هزة قوية لأمريكا .. لأن في دول تانية لسه مستعدة لإقراض أمريكا .. لأنهم لسه واثقين في اقتصادها .. وإنها هتقدر تسدد ديونها في أي وقت .. وده حصل فعلا في 2015 لما الصين باعت سندات أمريكية بقيمة 180 مليار دولار .. ولقيت ناس تشتريها ومحصلش حاجة أو كارثة للولايات المتحدة .

عرض المزيد