امريكا تكشف ثغرات في الجيش الروسي تقلب الموازين وتهديد صيني نووي لامريكا

ديسمبر 5, 2022


أمريكا تكشف عن نقطة ضعف روسيا ومعارك ضارية تنتظر الحرب قريبا .. رعب في أمريكا بسبب زيادة قوة الصين النووية والعسكرية

تطورات الحرب الروسية الاوكرانية

بعد ما كنا قولنا خلاص الحرب الروسية الأوكرانية في طريقها للانتهاء وهيتم اللجوء للمفاوضات.. الأخبار اللي طالعة الأيام اللي دي بتقول عكس كده خالص للأسف .. أوكرانيا بيجيلها دعم وتعزيزات عسكرية من أمريكا وأوروبا بمليارات الدولارات .. وفي نفس الوقت في دعوات للغرب إنه يوافق على إن أوكرانيا تضرب المطارات والقواعد العسكرية الروسية بعد ما كانوا بيقولولها بلاش علشان ميحصلش مشاكل .. وده معناه طبعا تصعيد جديدة في الحرب محدش عاوزه.
النهاردة وزير خارجية لاتفيا اللي اسمه إدغار رينكيفيكس في مقابلة مع بلومبرج .. قال للقادة الغرب لازم تسمحوا لأوكرانيا إنها تهاجم قواعد الصواريخ والمطارات الروسية من غير ما تخافوا من التصعيد اللي ممكن يحصل. كمان البيت الأبيض أعلن إن الولايات المتحدة هتبعت ذخائر بقيمة 400 مليون دولار دعم لأوكرانيا في أسرع وقت ممكن .. وبكده توصل مساعدات أمريكا لأوكرانيا من بداية الحرب لغاية دلوقتي إلى أكتر من 19 مليار دولار. المساعدات الجديدة دي هتتقدم من خلال سلطة السحب الرئاسي الأمريكا .. وده معناه إن وزارة الدفاع الأمريكي بقى مسموح لها إنها تاخد أسلحة من مخزونها الخاص وتشحنها إلى أوكرانيا بسرعة .. بدل الاجراءات الروتينية العادية اللي بتحصل كل مرة.

مش بس كده .. ده كمان وكيل وزارة الدفاع الأميركية للمشتريات والإمداد اللي اسمه بيل لابلانت .. سافر الأسبوع اللي فات إلى العاصمة البلجيكية بروكسل علشان يقابل قادة 45 دولة .. علشان يناقش معاهم أولويات دعم أوكرانيا الفترة الجاية .. وأهمها إرسال أنظمة الدفاع الجوي والأسلحة بعيدة المدى. أما وزير الدفاع الأميركي لويد أوستن .. فقال إن روسيا عندها نقطة ضعف مهمة جدا لازم أوكرانيا تستغلها .. طب إيه هي يا عم أوستن .. قال إن القوات الروسية بتعاني من نقص كبير في ذخائر المدفعية .. وهو ده اللي مكتفها في توسيع عملياتها العسكرية في أوكرانيا. وقال أوستن إن الروس بيواجهوا صعوبات لوجستية من بداية الحرب في أوكرانيا ولسه بيعانوا لغاية النهاردة .. وأكد إن القوات الروسية بتعتمد أوي على المدفعية في أي مناورات تدخلها .. وعلشان كده نقص ذخائر المدفعية ده عاملها مشاكل جامدة. كمان بيقول إن روسيا عاوزة تعمل مناورات برية في الحرب الفترة الجاية .. لكن هى معندهاش كميات كافية من الذخائر .. لأن المناورات البرية بتحتاج إلى كميات كبيرة من ذخائر المدفعية .. ومش هتقدر تستبدل النوع ده من الذخيرة بسرعة علشان القيود اللي مفروضه عليها دلوقتي .. وده طبعا في مصلحة أوكرانيا ولازم تشتغل على النقطة دي .. وده اللي حصل فعلا لما أوكرانيا ضربت مواقع تخزين تابعة لموسكو .. وده اتسبب في صعوبات للروس من ناحية توفير الذخائر.

الموضوع التاني الخطير بردو اللي عاوز اتكلم فيه معاكم النهاردة هو الرعب اللي في أمريكا دلوقتي بسبب تطور قدرات وقوة الصين العسكرية وبالذات النووية .. طب إيه الحكاية؟ وزارة الدفاع الأمريكية البنتاغون طلعت تقريرها السنوي بخصوص “قوة الصين العسكرية” .. ورسمت فيه صورة قاتمة لمستقبل التنافس العسكري بين البلدين .. علشان قدرات الصين التسليحية والعسكرية بتتقدم بشكل سريع جدا مقارنة بالسنين اللي فاتت. التقرير اللي رفعته الوزارة إلى الكونجرس اعترف بالتهديد اللي هتشكله الصين عسكريا خلال الـ 5 سنين الجايين .. وإنها هتنافس أمريكا بشكل كبير وبالذات في منطقتي المحيط الهندي والهادي. المتحدث باسم البنتاغون الجنرال باتريك رايدر .. قال بعد التقرير ما اتنشر إن مفيش حاجة هتقدر تمنع الولايات المتحدة الأمريكية من إنها تدافع عن مصالحها القومية في شرق آسيا .. وتحديدا جزيرة تايوان .. اللي التقرير كشف إن أجهزة الاستخبارات الأميركية بتتوقع إن الرئيس الصيني تشي جين بينغ عاوز يغزو الجزيرة وضمها بالقوة العسكرية قبل سنة 2027 .. يعني بالبلدي كده الصين عاوزه تاخدها بالعافية وأمريكا مش هتسيبها تعمل كده أبدا.

عرض المزيد