نهاية زيلنسكي علي يد امريكا والسلام مع روسيا علي الابواب

ديسمبر 15, 2022


فاينانشيال تايمز: قضية فساد قطر تهز البرلمان الأوروبي .. تركيا تدخل لعبة الغاز وتتحول إلى مركز لصادرات الغاز الروسي لأوروبا .. نهاية زيلنسكي ؟

نهاية زيلنسكي

كنا اتكلمنا معاكم امبارح عن الكلام اللي بيتقال عن وجود حالة رشوة لنائبة رئيس البرلمان الأوروبي إيفا كايلي من دولة خليجية قالوا إنها قطر وده اتسبب في القبض عليها ومعاها 4 أشخاص تانيين .. وتمت مصادرة أموالهم .. النهاردة بقى صحيفة فاينانشيال تايمز كتبت تقرير بعنوان “فضيحة الفساد في قطر تهز البرلمان الأوروبي” .. اتكلكت فيه عن تداعيات الرشوة دي. الصحيفة بتقول إن البرلمان الأوروبي بيواجه دلوقتي فضيحة فساد مدوية .. بعد ما الشرطة البلجيكية صادرت 600 ألف يورو .. واحتجزت عضوين في البرلمان الأوروبي علشان تحقيق دولي في مزاعم بأن قطر اللي بتستضيف كأس العالم دلوقتي كانت عاوزة تشتري نفوذ ليها برشوتهم. التقرير بيقول بردو إن القضاء البلجيكي اتهم 4 أشخاص بـ “المشاركة في منظمة إجرامية وغسيل الأموال والفساد” .. بعد ما فتش بيوتهم واعتقالهم خلال الأسبوع اللي فات .. بما فيهم منازل 2 من أعضاء البرلمان الأوروبي وعائلة عضو سابق في البرلمان الأوروبي في إيطاليا.
كمان التهم الموجهة لأعضاء البرلمان الأوروبي دي أدت بالفعل إلى استقالتهم .. وتعليق التصويت البرلماني على منح المواطنين القطريين السفر بدون تأشيرة إلى الاتحاد الأوروبي .. اللي كان المفروض يحصل الأسبوع الجاي.
مكتب المدعي العام البلجيكي قال إنه بيشتبه في إن أطراف تالتة في مناصب سياسية واستراتيجية جوه البرلمان الأوروبي دفعت مبالغ كبيرة من المال أو قدمت هدايا كبيرة لبعض الأعضاء علشان التأثير على قرار البرلمان .. لكن قطر طلعت ورفضت كل الكلام اللي بيتقال ده .. ومسؤول قطري قال للصحيفة كده بالنص : “أي ارتباط للحكومة القطرية بالادعاءات المبلغ عنها لا أساس له من الصحة ومضلل بشكل خطير”.

الخبر اللي جاي ده مهم وخطير جدا رغم إنه مفيهوش تفاصيل كتيرة لكن مهم .. طب إيه الموضوع .. الموضوع إن تركيا من زمان وهى عاوزة يكون ليها نصيب من كعكة الغاز الطبيعي وصادراته لأوروبا .. وده ممكن يكون السبب الحقيقي اللي خلاها تتدخل في الأزمة الروسية الأوكرانية .. وتخليهم يوقعوا اتفاق تصدير الحبوب اللي انقذ العالم من الجوع .. النهاردة بقى اتحقق الهدف الحقيق لتركيا من الموضوع .. طب إزاي الرئاسة التركية أصدرت بيان قالت فيه إن الرئيس الروسي بوتين والرئيس التركي أردوغان اتكلموا مع بعض في تفاصيل تخص اتفاق تصدير الحبوب وتصدير سلع تانية غير الحبوب بردو الفترة الجاية .. وفي وسط المكالمة كده جابوا سيرة إنشاء مركز محتمل للغاز في تركيا .. طب إيه الحكاية بقى؟ روسيا المفروض إنها بتصدر الغاز بتاعها إلى أوروبا عن طريق أوكرانيا وخطوط نوردستريم 1 و2 اللي حصل فيهم مشاكل الفترة اللي فاتت لو تفتكروا وحصل فيهم تخريب وتسريب .. وعلشان كده روسيا قالت أنا لازم أشوف طريقة تانية آمنة لنقل الغاز بتاعي لأوروبا تكون بعيدة عن الخطوط دي .. فراحت لتركيا واتكلمت معاها في شهر 10 اللي فاتت على إنها تعمل مركز لنقل صادرات الغاز بتاعها إلى أوروبا .. وطبعا أردوغان ما صدق ومسك في الفرص بإيده وسنانه .. وناقش الفكرة أكتر مع بوتين النهاردة في المكالمة اللي حصلت ما بينهم. وعلشان كده هنبدأ نسمع خلال الفترة الجاية عن استعدادات تركيا لنقل صادرات الغاز الروسي إلى أوروبا .. وهتبدأ تعمل البنية التحتية اللازمة لكده .. وأكيد طبعا هتستفيد من رسوم النقل دي .. والاقتصاد التركي هينمو أكتر .. وده حقيقي ذكاء من الراجل اللي اسمه أردوغان ده .. بصراحة بيعرف يلعب سياسة واقتصاد صح ويستغل أي فرصة قدامه .

هنروح بقى دلوقتي لأوكرانيا والكلام اللي اتقال عن مصير الرئيس الأوكراني زيلينسكي وهل الغرب ممكن يتخلى عنه ويعمل عليه انقلاب الفترة الجاية ولا لأ .. النهاردة الكاتب الروسي بولينا بيتروسيفيتش كتب مقال في صحيفة “موسكوفسكي كومسوموليتس” الروسية قال فيه إن الولايات المتحدة مش بعيد إنها تعمل إنقلاب على زيلينسكي قريب جدا وتتخلى عنه .. وتغير الكوادر السياسية في أوكرانيا .. وده اللي أكدته قبل كده المتحدثة باسم وزارة الخارجية الروسية ماريا زاخاروفا .. لما قالت إن أمريكا بتجهز دلوقتي إنقلاب على زيلينسكي. وقال إن زيلينسكي بقى عامل زي الأصول السامة للولايات المتحدة الأمريكية على الرغم من ظهوره كـ “رجل العام” في المجلات اللامعة ووسائل الإعلام .. لكن في الحقيقة أمريكا عاوزة تتخلص منه. طب هل ده هيغير من نظرة روسيا للحرب مع أوكرانيا .. بيقولك لأ .. روسيا لا يهمها زيلينسكي أو غيره .. أو مين اللي موجود في السلطة .. لأنها مهتمة بس بتحقيق النصر في العملية العسكرية اللي بتقوم بيها دلوقتي. كمان بيقول إننا مش لازم نبقى واثقين في الغرب في المسألة دي ونقول إنها هتجيب واحد كويس يمسك أوكرانيا .. لأنها هتجيب بس رجالاتها المجنونين اللي ماشين على هواها .. وده بينذر بتفاقم الوضع مش تهدأته.
الكاتب كمان بيقول إن القاعدة المعروفة في حكم أوكرانيا هى إن رئيس الدولة أو الحكومة بيجي الحكم علشان يكسب فلوس كتير من غسيل الأموال اللي بيعمله وهو في السلطة وأول ما يجمع مليار دولار بيمشي ويسيب البلد .. وده اللي حصل قبل كده مع رئيس الوزراء السابق أرسين ياتسينيوك .. ومع الرئيس السابق بيترو بوروشينكو .. وده بردو اللي هيحصل مع زيلينسكي .. اللي تقريبا كسب المليار دولار دلوقتي .. وغالبا بيجهز دلوقتي إنه يعيش ويستقر هو وأسرته في لندن بعد الإنقلاب عليه.

عرض المزيد