طبول الحرب الاهلية في امريكا بعد توجية اتهامات جنائية الي الرئيس الامريكي السابق ترامب

ديسمبر 28, 2022


بعد النفط : الاتحاد الأوروبي يحدد سقف لسعر الغاز الروسي .. تفاصيل تدريب أمريكا للجيش الأوكراني على منظومة باتريوت .. الاتهامات الجنائية في اقتحام الكونجرس تهدد مستقبل ترامب في الانتخابات الرئاسية القادمة

تحديد سقف لسعر الغاز الروسي

لو تفتكروا من فترة كده الاتحاد الأوروبي قرر وضع سقف لأسعار النفط الروسي وقال أنا مش هشتري النفط من روسيا لو زاد عن 60 دولار .. النهاردة بقى الاتحاد الأوروبي قرر وضع سقف لأسعار الغاز الروسي .. طب إيه الحكاية؟
وزراء الطاقة بتوع دول الاتحاد الأوروبي عملوا اجتماع ووافقوا بعد محادثات استمرت أسابيع كان فيها انقسام في الرأي حوالين الموضوع ده لكن وافقوا في النهاية على وضع سقف لسعر الغاز الروسي عند 180 يورو (يعني حوالي 190 دولار) لكل ميجا وات / ساعة. يعني سقف الأسعار ده هيبدأ أول ما أسعار الغاز تكون في السوق أعلى من 180 يورو لأنها دلوقتي أقل من كده ووصلت في الشهور الأخيرة إلى حوالي 100 يورو لكل ميجاواط / ساعة .. ورغم كده تعتبر أعلى بكتير من المتوسط في التوقيت كل سنة. لكن في شرط مهم لازم نعرفه بردو علشان السقف ده يتنفذ .. إيه هو .. إنه لازم يكون فرق السعر ده مع الأسعار العالمية للغاز الطبيعي المسال أكبر من 35 يورو لمدة 3 أيام .. يعني لازم الفرق بين السعر العالمي وسعر 180 يورو بتاع سقف الاتحاد الأوروبي يكون أكبر من 35 يورو لمدة 3 أيام ورا بعض .. علشان يقدروا ينفذوا قرار تحديد سقف السعر. وثيقة الاتفاق ده بتقول إن بداية التنفيذ هتكون من 15 فبراير الجاي .. ومش هيتم تطبيقه على الصفقات اللي بتتم خارج البورصة العالمية. طبعا الاتفاق على تحديد سقف السعر ده مجاش كده بسهولة .. لأن أوروبا كانت منقسمة إلى فريقين .. واحد كان بقيادة ألمانيا اللي تعتبر أكبر اقتصاد في أوروبا ومعاها هولندا والدنمارك وكانوا عاوزين الدول تاخد نهج حذر في الملف ده علشان ميحصلش ارتباك في سوق الطاقة أو نقص في الإمدادات لأوروبا.. والتاني كان بيضم بلجيكا وإيطاليا واليونان وبولندا اللي كانوا بيضغطوا علشان يحصل سيطرة على أسعار الغاز. الاتحاد الأوروبي بيقول إنه عمل تحديد سقف للسعر مش علشان يرخم على روسيا وخلاص .. لأ .. هو عاوز يمنع الارتفاع الشديد في الأسعار اللي بيحصل كل شوية.

وبعد الإعلان عن الاتفاق .. كان لازم روسيا طلعا تطلع تعلق عليه .. وبالفعل الكرملين طلع بيان قال فيه إن السقف الأوروبي لأسعار الغاز ده مش مقبول وبيعتبر اعتداء على أسواق الطاقة وبينتهك عملية التسعير في السوق. كمان قال إن روسيا هتاخد شوية وقت علشان تعمل تقييم لإيجابيات وسلبيات القرار ده بالنسبة لها .. وهتدرس الموضوع بعناية .. ومش هتاخد أي قرارات سريعة فيه. طبعا أوروبا عاوزة تخنق روسيا من كل اتجاه .. الأول كان تحديد سقف لسعر النفط وقالت إنه هيكون 60 دولار .. ودلوقتي الغاز هتخلي بـ 180 يورو لكل ميجا واط / ساعة .. يعني عاوزة تتحكم في الموارد المالية الروسية بكل الطرق لأنها عارفة إن روسيا بتعتمد بشكل أساسي على إيرادات النفط والغاز وهما العنصر الرئيسي في الموازنة بتاعتها .. ولو قدرت تقلل الإيرادات دي هيبقى حاجة كويسة ليها .. وممكن تؤثر على الحرب الروسية الأوكرانية لصالح أوكرانيا ومن وراها الاتحاد الأوروبي وأمريكا طبعا. من كام يوم كنا اتكلمنا عن استعداد أمريكا لتسليم أوكرانيا منظومة صواريخ باتريوت وإن القرار ناقص بس توقيع وزير الدفاع الأمريكي عليه .. النهاردة بقى مصدر عسكري أمريكي رفيع بيقول لموقع سكاي نيوز إن القوات الأميركية بدأت تدرب الجيش الأوكراني على استخدام منظومة باتريوت الموجود عدد منها في شرق رومانيا وشمالها على الحدود مع أوكرانيا. المصدر العسكري ده قال إن عمليات التدريب دي بيتولاها عناصر من وحدات (سترايكر) الهجومية المنتشرة في رومانيا .. وعددها حوالي 3 آلاف عسكري .. وإن التدريب على باتريوت بيحصل ببشكل سري .. بحجة إن أمريكا لسه مخدتش أي قرار سياسي بميعاد خول المنظومة دي لأوكرانيا .. واللي بتعتبرها وزارة الدفاع الأمريكية عامل مهم هيغير قواعد التوازن العسكري مع روسيا.

كمان بيقول إن استخدام منظومة الـ “باتريوت” بعد ما توصل أوكرانيا هيكون محصور في مواجهة خطر الصواريخ الباليستية الروسية اللي بتقصف المدنيين .. ومش هيتم تفعيلها ضد الطيارات المسيرات المفخخة .. لأن صواريخ “باتريوت” تكلفتها عالية جدا. طبعا لازم نعرف هنا إن روسيا حذرت قبل كده من إن جميع الأسلحة الغربية اللي هيتم إرسالها إلى أوكرانيا هتكون أهداف مشروعة ليها .. ومش هيهمها حاجة سواء باتريوت أو غيرها .. كله هيكون في مرمى نيرانها .. لدرجة إن السفارة الروسية في واشنطن قالت إن نقل منظومة صواريخ “باتريوت” إلى أوكرانيا لو حصل هيكون خطوة استفزازية ممكن تؤدي إلى عواقب محدش يقدر يتوقعها. النهاردة حصلت حاجة مهمة في أمريكا بخصوص الرئيس الأمريكي السابق ترامب .. وممكن تمنعه من خوض سباق الانتخابات الرئاسية الأمريكية الجاية اللي أعلن ترشحه فيها .. طب إيه اللي حصل؟ اللي حصل إن لجنة التحقيق البرلمانية حول الهجوم على مبنى الكابيتول اللي هو الكونجرس يعني .. واللي حصل في 6 يناير 2021 .. لما أنصار ترامب هاجموا المقر لمنع التصديق على انتخاب جو بايدن رئيسا للولايات المتحدة .. صوتت لصالح توجيه اتهامات جنائية للرئيس الأميركي السابق دونالد ترامب .. وصوتت اللجنة بالموافقة على نتائج تقريرها النهائي اللي كان فيه إحالات جنائية لوزارة العدل بحق الرئيس السابق. الاتهامات دي تتعلق بالدعوة إلى التمرد وعرقلة إجراء رسمي (اللي هو المصادقة على الانتخابات الرئاسية) والتآمر ضد الدولة الأميركية .. لدرجة إن أعضاء اللجنة اللي منهم 7 ديموقراطيين و2 جمهوريين قالوا إن ترامب بقى عديم الأهلية لتولي أي منصب رسمي. لكن هنا في نقطة مهمة .. وهى إن تصويت اللجنة ده يعتبر حاجة رمزية ومش ملزم إلى حد كبير .. لأن أعضاءها ميقدروش يوجهوا التهم دي إلى ترامب بنفسهم .. لكن الموضوع كله بيرجع إلى وزارة العدل اللي عينت مدعي عام للتحقيق بشكل مستقل حوالين الموضوع .. وهى اللي هتقرر إذا كان ترامب هيتحاكم ولا لأ .. لكن تقرير اللجنة واتهاماتها بيمهد لكده.

عرض المزيد