ولعت امريكا هتسلم اوكرنيا منظومات باتريوت وبوتين بيقول روسيا ردها هيكون مزلزل

ديسمبر 28, 2022


اية السبب وراء زيارة زيلنسكي لامريكا ؟
وهل كدة الامور بقت امنة في اوكرنيا لهذة الدرجة ؟
زيلنسكي سايب اوكرنيا ومسافر بررة كدا عادي ؟
طيب يا تري روسيا هتتنتهز غيابة برة اوكرنيا وهتعمل اي تصرف مفاجي ؟
اية موضوع بيلاروسا و التقارب اليلاروسي الروسي الاخير الغير عادي
ياتري فية ترتيبات جديدة لدخول بيلاروسيا الحرب مع روسيا
كل دة هنشوفة النهاردة بالتفصيل
يلا بينا نبدا حلقتنا

زيلينسكي يتوجه إلى أمريكا

النهاردة الرئيس الأوكراني زيلينسكي هيطلع بره أوكرانيا لأول مرة من بداية الحرب مع روسيا .. طب يا ترى اختار أنهى دولة علشان يروحها .. طبعا من غير ما نفكر اختار أمريكا .. والمفروض إنه هيقابل الرئيس الأمريكي جو بايدن في البيت الأبيض وهيلقي كلمة قدام الكونجرس. البيت الأبيض قال إنه بمناسبة أول زيارة خارجية لزيلينسكي من بدء الحرب الروسية على بلده في 24 فبراير اللي فات .. المفروض إن الرئيس الأميركي هيعلن عن مساعدات كبيرة جديدة لأوكرانيا .. هتشمل نظام باتريوت للدفاعات الجوية المتطورة. البيت الأبيض بيقول إن الزيارة دي بتؤكد استمرار دعم الولايات المتحدة لأوكرانيا طالما اقتضت الضرورة ده . طبعا وسائل الإعلام الأمريكية شغالة بقالها يومين على الزيارة دي .. وفي بعضها قال إن بايدن ناوي يعلن عن حزمة أسلحة جديدة لكييف .. هتشمل لأول مرة صواريخ باتريوت .. اللي أثبتت قدرتها على نطاق واسع في السنوات الأخيرة .. واللي قادرة فعلا على الحد بقوة من فعالية الضربات الروسية على أوكرانيا. طب الزيارة دي جت إزاي ؟ في مكالمة حصلت يوم 11 ديسمبر اللي فات بين بايدن وزيلينسكي ناقشوا فيها فكرة زيارة واشنطن .. ووافق الرئيسين على الفكرة .. وبالفعل بعدها بـ 3 أيام اتوجهت دعوة رسمية لزيلنسكي .. اللي وافق عليها يوم الجمعة اللي فاتت وتم تأكيدها يوم الأحد لما بدأ البيت الأبيض التنسيق بخصوصها مع رئيسة مجلس النواب نانسي بيلوسي لترتيب خطاب الكونغرس. كمان البيت الأبيض عمل مشاروات مع زيلينسكي حوالين الترتيبات الأمنية اللي هيقدر من خلالها يغادر أوكرانيا .. بما فيها خطر إمكانية تحرك روسي خلال تواجده خارج البلاد .. وكمان ناقشوا الإجراءات اللي تم اتخاذها لحمايته .. يعني أمريكا مش سايبة حاجة للصدفة. بعض وسائل الإعلام بتقول إن المساعدات الأمريكية اللي هيتم الإعلان عنها خلال الزيارة هتكون الأكبر وهتوصل إلى37 مليار دولار .. علشان تضمن استمرار الدعم العسكري الأمريكي لأوكرانيا خلال الشهور الجاية. كمان وسائل الإعلام قالت إو زيلينسكي هيقول كلمة في الكونجرس الأمريكي .. واللي أكد الكلام ده الرسالة اللي بعتتها رئيسة مجلس النواب نانسي بيلوسي للنواب وقالتلهم لهم فيها لازم تحضروا علشان هيحصل حدث مهم النهاردة . طبعا الزيارة دي تعتبر الأولى لزيلينسكي من بداية الحرب لأنه كان مخصّص كل وقته لقيادة الجهد الحربي وتنسيق الأنشطة السياسية والدبلوماسية والإنسانية في أوكرانيا .. وكان بيعمل كل اتصالاته قبل كده مع القادة عن طريق الفيديو أو الهاتف.

بالتأكيد الزيارة دي في التوقيت ده مش جاية كده وخلاص .. وهيكون ليها تداعيات وأصداء كتيرة خلال الفترة الجاية .. وبالذات إن أمريكا هتعلن عن تسليم أوكرانيا منظومة باتريوت اللي هتغير مسار الحرب تقريبا .. وهتخلي أوكرانيا تقدر تقف قدام روسيا أكتر الفترة الجاية. طبعا روسيا بعد ما عرفت إن زيلينسكي رايح على أمريكا .. ما استنتش لغاية ما يوصل وراحت طلعت بيان مهم جدا بترد فيه على الزيارة دي واللي ممكن يحصل فيها .. طب قالت إيه ؟
الكرملين طبعا عارف إن الزيارة دي هينتج عنها تسليم أمريكا منظومة باتريون لأوكرانيا .. وعلشان كده طلع بيان قال فيه إن شحنات الأسلحة الأميركية الجديدة لأوكرانيا مش هتعمل حاجة غير إنها هتزود الوضع في البلد سوء .. وهتفاقم النزاع مع روسيا .. يعني من الآخر كده هتزود الطين بلة. كمان المتحدث باسم الرئاسة الروسية دميتري بيسكوف قال إن كل ده لا يبشر بالخير لأوكرانيا .. لأن أكيد الأسلحة الأمريكية دي هتخلي العمليات العسكرية تزيد والدنيا هتولع اكتر من الأول .. وعلشان كده روسيا بتقول إن الزيارة دي هتخلي زيلينسكي مصمم على استمرار الحرب وهيرفض التفاوض مع الرئيس بوتين بعد الزيارة .. وده هيعقد الدنيا أكتر بعد ما كنا بنقول إن الحرب ماشيه في طريق النهاية وإن المفاوضات قربت. كان في زيارة مهمة جدا عملها بوتين من يومين إلى بيلاروسيا .. الزيارة دي عاملة قلق جامد لأوروبا .. لدرجة إنهم خايفين منها جدا وبيقولوا إنها هتأثر على الحرب اللي شغالة دي الفترة الجاية وممكن تغير مسارها .. طب إيه الموضوع؟

من يومين كان بوتين بيزور بيلاروسيا وقابل فيها الرئيس ألكسندر لوكاشينكو .. وبعت من خلالها رسائل لأوروبا هترسم ملامح الجبهة الشرقية من القتال مع بداية السنة الجديدة. ألكسندر هوفمان المستشار الروسي في الاتصالات والسياسات الاستراتيجية .. قال إن الزيارة دي بتعتبر الأولى لبيلاروسيا من 3 سنين وكان فيها كذا رسالة من بوتين لأوروبا .. أول رسالة هى التأكيد على التعاون النووي الروسي مع بيلاروسيا .. واستعداد روسيا لتطوير المشاريع النووية في بيلاروسيا .. وده معناه تحول كبير في الشراكة مع بيلاروسيا اللي بتعتبر بوابة لحدود روسيا من ناحية الغرب .. وكمان بتعتبر رسالة واضحة لنقل الترسانة الأميركية في محيط بولندا وتهديد منطقة البلطيق بالكامل. تاني رسالة هى إن بوتين قال لبيلاروسيا متخافيش من أي عقوبات ممكن يتم فرضها عليكم من أوروبا إحنا في ضهركم .. عن طرق زيادة التعاون الاقتصادي إلى حد التكامل.. ودي رسالة لأوروبا معناها إن العقوبات المفروضة على بيلاروسيا مش هتضعفها طالما روسيا واقفة معاها. تالت رسالة هى الوحدة العسكرية بين روسيا وبيلاروسيا على الجبهة الشرقية .. لأن بيلاروسيا ليها وضع استراتيجي مهم في الحرب دي .. وبوتين قال إن روسيا هتدافع عن بيلاروسيا إذا تعرضت لأي تهديدات عسكرية مباشرة.
على الناحية التانية بقى .. أوروبا يا عيني مش عارفة تعمل إيه .. لدرجة إن المتحدث باسم الحكومة الفيدرالية الألمانية شتيفن هيبيستريت مقدرش يقول غير إن ألمانيا قلقانة جدا من الزيارة دي لأنها هتغير دور بيلاروسيا في الحرب من ساعة ما بدأت وده هيكون في صالح روسيا بالتأكيد . طبعا بوتين بالزيارة دي عاوز يأمن كل جبهات القتال ويضمن ولاء الدول اللي حواليه ويعرف مين اللي معاه ومين ضده .. علشان شكله كده بيخطط لحاجات كبيرة مع بداية السنة الجديدة .. وممكن يحصل تغيير في استراتيجية الحرب الفترة الجاية .. خلينا نستنى ونشوف.

عرض المزيد