كيف يجروء زيلنسكي علي فعل ذلك مع امريكا | بوتين يتوعد برد قاسي

ديسمبر 28, 2022


الرئيس الأوكراني يسخر من أمريكا .. كيف ؟ .. تصريحات نارية من الرئيس الروسي بوتين ووزير الدفاع شويغو عن أسرار الحرب الروسية الأوكرانية .. روسيا تقرر رفع عدد قوات الجيش ردا على تحركات الناتو .. وأمريكا تسلم أوكرانيا منظومة باتريوت رغم تحذير روسيا

الرئيس الأوكراني يسخر من أمريكا

زي ما انتوا عارفين الرئيس الأوكراني زيلينسكي موجود دلوقتي في أمريكا .. في أول زيارة خاجية ليه من ساعة ما بدأ الحرب الروسية الأوكرانية في شهر فبراير اللي فات .. لكنه أول ما وصل واشنطن اتعرض لعاصفة من الانتقادات بسبب اللبس الرياضي اللي كان لابسه .. واللي متعود عليه علطول .. وإنه مش لابس بدلة وزي رسمي .. وده يعتبر إهانة لأمريكا مينفعش تعدي. ناس كتيرة وبالذات الإعلاميين اعتبروا إن اللي حصل ده علامة على عدم الاحترام .. لأن أي رئيس بيجي البيت الأبيض لازم يكون لابس بدلة رسمية .. إنما زيلينسكي جاي لابس “تي شيرت كاكي” اللي هو بيلبسه علطول من ساعة ما الحرب بدأت. الانتقادات وصلت لحد الأمريكان بيقولوا إن زيلينسكي مش بيحترم البلد اللي مخلياه لسه على قيد الحياه لغاية دلوقتي .. وشبهوا اللبس بتاعه بالملابس الرياضية اللي بيلبسها رجال المافيا في أوروبا .. وعلشان ده دي إهانة كبيرة. ده بالنسبة للي حصل مع زيليسنيكي .. لكن خلال الزيارة حصلت الحاجة اللي كانت روسيا بتحذر منها خلال اليومين اللي فاتوا وأمريكا ما اهتمتش بالتحذيرات دي .. طب إيه اللي حصل ؟ أمريكا أعلنت عن تقديم مساعدات عسكرية جديدة لأوكرانيا بقيمة 1.85 مليار دولار .. من ضمنها نظام الدفاع الجوي “باتريوت” .. اللي كان زيلينسكي عمال كل شوية يطلبه منها خلال الشهور اللي فاتت علشان يواجه الضربات الصاروخية الروسية .. وكانت بتقوله لسه مش دلوقتي. أمريكا بتقول إن تزويدها أوكرانيا بمنظومة باتريوت جاي من التزمها نحو الشعب الأوكراني وتأكيدها على مساعدته في الحرب دي .. وبتقول إن روسيا حاولت خلال الـ300 يوم اللي فاتت من الحرب إنها تمسح أوكرانيا من الخريطة لكنها معرفتش بفضل المساعدات الغربية ليها .. ودلوقتي عاوزة تستغل الشتاء كسلاح لتجويع المدنيين الأوكرانيين وتعريضهم للبرد القارس لكنها مش هتقدر. كمان المساعدات مش هتكون منظومة باتريوت بس .. لأ .. هيكون معاها معدات وأسلحة حيوية هتستخدمها أوكرانيا في الدفاع عن نفسها في ساحة المعركة .. بالإضافة إلى مساعدات تانية بقيمة 850 مليون دولار .. علشان توصل بكدة المساعدات العسكرية الأميركية إلى أوكرانيا إلى 21 مليار دولار أميركي من ساعة وصول بايدن للحكم.

وعلى الرغم من إعلان أمريكا تزويد أوكرانيا بمنظومة باتريوت .. لكن واضح إن أوروبا مش هتقدر تدخل معاها على الخط في الموضوع ده .. وأول حاجة جت من ألمانيا أهم دولة في الاتحاد الأوروبي لما أعلن المتحدث باسم الحكومة ستيفن هيبيستريت عن عجز بلده عن تزويد أوكرانيا بالمنظومة .. علشان هى سلمت بطارياتها الثلاثة من النوع ده لبولندا .. ومبقاش عندها حاجة تقدر تديها لأوكرانيا. الحكومة الألمانية عاوزة تقول لأوكرانيا كان نفسى والله أساعدك بس ما باليد حيلة .. معنديش حاجة أساعدك بيها .. وده معناه إن أمريكا هتلاقي نفسها لوحدها اللي بتدعم أوكرانيا بالمنظومة دي .. وده ممكن يعمل مشكلة في المستقبل .. لأن أمريكا مش هتفضل تساعد أوكرانيا لوحدها .. لازم أوروبا تدخل معاها على الخط .. لأنها مش هتشيل الشيلة لوحدها أكيد. علشان كده الناس اللي ممكن تكون فرحانة إن أمريكا هتزود أوكرانيا بمنظومة باتريوت لازم تفكر شوية في مستقبل القرار ده .. والمشاكل اللي ممكن تواجهها أوكرانيا فيما بعد.
النهاردة الرئيس الروسي فلاديمير بوتين ووزير دفاعه سيرغي شويغو قالوا شوية تصريحات نارية عن الحرب الروسية الأوكرانية .. في الاجتماع الموسع اللي عملوه لكبار القادة العسكريين .. واللي حصل فيه تحديد مهام الجيش الروسي في السنة الجديدة .. طب قالوا إيه يا ترى؟ خلونا نبدأ بوزير الدفاع شويغو اللي قال إن 27 دولة في العالم أنفقت 97 مليار دولار على إمدادات الأسلحة لأوكرانيا لغاية دلوقتي .. وإن دخول فنلندا والسويد لحلف الناتو هيجبر روسيا على إنشاء تشكيلات عسكرية جديدة في شمال غرب البلاد .. ورفع عدد المطلوبين للتجنيد في المناطق دي .. وعلشان كده القوات المسلحة الروسية هيزيد عددها إلى 1.5 مليون جندي .. فيهم 695 ألف جندي بالتعاقد .. علشان نضمن تنفيذ جميع المهام العسكرية المطلوبة.

وبيقولك إن المستفيد الأكبر من اللي بيحصل في أوكرانيا هى الولايات المتحدة الأمريكية اللي بتستفيد من إضعاف شركائها في أوروبا .. وجزء من الأسلحة اللي بتوفرها لأوكرانيا بتوصل لكذا دولة تانية في العالم بعد كده وبالتالي بتزود مبيعات شركات الأسلحة بتاعتها .. مش بس كده ده كمان أمريكا بتزود أوكرانيا بوسائل عسكرية حديثة زي مثل 70 قمر صناعي عسكري وأقمار صناعية لأغراض تانية .. كمان بيتم تصوير أعمال الجيش الأوكراني في وسائل الإعلام الغربية على إنها “بطولية” .. في حين الجيش الأوكراني بيقوم بتصفية العسكريين اللي مش بيطيعوا الأوامر .. إنما روسيا بتقوم بالعملية العسكرية في أوكرانيا من أجل الدفاع عن المواطنين من الإبادة الجماعية.شويغو بيقول بردو إن التعبئة الجزئية اللي حصلت قبل كده ساعدت القوات المسلحة الروسية على توسيع سيطرتها على مساحة أكبر بـ5 أضعاف من المساحات اللي كانت بتسيطر عليها في دونيتسك ولوغانسك قبل بدء الحرب في 24 فبراير اللي فات .. كمان العمليات العسكرية أثبتت مهنية القوات المسلحة الروسية وفعاليتها ومرونتها وسرعة استجابتها. وقال حاجة مهمة جدا وهى إنه في شهر يناير هتدخل الغواصة “الأدميرال غورشكوف” إلى الخدمة القتالية .. ودي بتقدر تشيل أحدث الصواريخ الروسية اللي اسمها “تسيركون” .. وده هيساعد الجيش جدا .. في الوقت اللي الأسلحة النووية جاهزة للاستخدام في أي وقت .. بعد ما القوات النووية الاستراتيجية نجحت خلال التدريبات في تنفيذ مهام توجيه ضربة نووية ضخمة ردا على هجوم نووي من العدو.

عرض المزيد