مفاجأة بوتين يطلب وقف الحرب الروسية الاوكرانية ويمد يدة بالسلام هل دي هدية السنة الجديدة ؟

ديسمبر 28, 2022


بوتين : مستعدين للتفاوض مع أي طرف لإنهاء الحرب .. وأوكرانيا ترد: الإنسحاب من الأراضي المحتلة أولا .. وزيلينسكي يوعد شعبه بصنع معجزة قريبا

انهاء الحرب الروسية الاوكرانية

مين فينا مش نفسه الحرب الحرب الروسية الأوكرانية تخلص .. ده السؤال اللي على لسان كل دول العالم دلوقتي لكن محدش عارف ده ممكن يحصل ازاي .. وعلشان كده الرئيس الروسي فلاديمير بوتين قال تصريحات مهمة النهاردة في المسألة دي .. طب قال ايه ؟ قال إن روسيا مستعدة للتفاوض مع كل أطراف الصراع الأوكراني .. بس كل ما يتكلم مع اوكرانيا والدول الغربية اللي بتدعمها يرفضوا المحادثات معاه . بوتين قال إننا من ناحيتنا مستعدين للتفاوض مع اي حد عاوز سحل المشكلة في اوكرانيا .. لكن القرار يرجع لهم هما مش احنا .. احنا موافقين على التفاوض وهما اللي رافضين. كمان بيقول إن روسيا ماشية في الاتجاه الصح في الحرب دي .. طب ليه يا عم بوتين .. بيقولك علشان الغرب بقيادة الولايات المتحدة بيحاول تقسيم روسيا لكن مش عارف .. احنا باللي بنعمله ده بنحافظ على مصالحنا الوطنية ومعندناش اختيار تاني علشان نحافظ بيه على نفسنا. وبيقول كمان أن أساس الصراع في أوكرانيا هو “سياسة خصومنا الجيوسياسيين اللي بتهدف إلى تفكيك روسيا التاريخية .. لأنهم ماشيين بسياسة فرق تسد .. وياما حاولوا انهم يعملوا كده طول التاريخ لكن روسيا استمرت قوية. وبيقول إن روسيا من سنة ٢٠١٤ وهى بتحاول تحل الأزمة الأوكرانية بشكل سلمي لكن مفيش فايدة .. حاولنا دائما ناخد ضمانات لحل جميع النزاعات اللي بتحصل بالمفاوضات لكن للاسف الطرف التاني كان بيعمل حاجات عكس اللي بنتفق عليها .. وده اللي خلانا نقوم بالعمليات العسكرية اللي بتحصل دلوقتي.

مش كده وبس .. ده كمان بيقول لما حد سأله عن منظومة باتريوت الأمريكية هتعملوا معاها ايه .. قالوا هندمرها بنسبة ١٠٠% ومش فارق معانا أن أمريكا تديها لأوكرانيا .. لأن الجيش الروسي هيدمرها بالتأكيد. بعد الكلام ده أوكرانيا طبعا كان لازم ترد على بوتين .. وفعلا المستشار الرئاسي الأوكراني ميخايلو بودولاك خرج وقال إن روسيا مش عاوز تتفاوض وبالذات أنها بتتنصل من مسؤليتها عن الحرب واللي عملته في اوكرانيا. مستشار الرئاسة الأوكراني بيقول بردو إن بوتين محتاج يعترف باللي عمله فينا .. روسيا هى اللي بدأت الحرب مش احنا .. وقتلت المواطنين الأبرياء .. ولما بوتين بيطلع يقول أنا مستعد للتفاوض هو بيقول كده علشان يشيل من على نفسه المسئولية مش اكتر. في نفس السياق ده .. دبلوماسي أوكراني سابق اسمه إيفان سيهيدا قال إن روسيا عارفة كويس أنها احتلت اراضي تبع أوكرانيا .. واحنا مصرين على أنها لازم تخرج الاول من الأراضي دي علشان نتفاوض معاها .. لأن أي تنازل عنها غير مقبول .. وده حقنا بالقانون الدولي وميثاق الأمم المتحدة. الدبلوماسي الأوكراني ده بيقول إن روسيا قالت إنها مستعدة للتفاوض اكتر من مرة قبل كده .. وكل مرة بعدها بتزود استعدادها العسكري مش تقلله .. واخر مرة عملت تعبئة جزئية للقوات بعد ما كانت عاوزة تتفاوض.

كمان بيقول إن المفاوضات هتدي لروسيا هدنة ووقت علشان تعيد تجهيز جيشها والهجوم تاني علينا .. واحنا معندناش ثقة فيهم من ساعة ما احتلوا شبه جزيرة القرم . طبعا أوروبا دلوقتي المفروض بتحتفل بالكريسماس وأعياد الميلاد المجيد والبيوت كلها مليانة احتفالات .. لكن للأسف اللي بيحصل في أوكرانيا السنة دي غير كده خالص ومش هيخليهم يعرفوا يحتفلوا بحاجة بسبب الحرب مع روسيا .. وعلشان الرئيس الأوكراني يواسي شعبه في الظروف الصعبة دي .. خرج عليهم وقال كلمة بمناسبة الكريسماس .. طب قال قيها إيه . الرئيس زيلينسكي قال لشعبه إنه لازم يستحمل ويصبر شوية لغاية ما الأزمة دي تعدي لان ثمن الحرية غالي .. وقالهم إننا لازم نحتفل بأعيادنا رغم الظروف الصعبة اللي بنعيشها .. واللي مش هيخلصنا منها إلا معجزة هنصنعها بإيدينا قريب جدا. كمان قالهم لازم نحس بروح عيد الميلاد التقليدية ولكن بشكل مختلف .. لأن العشاء اللي كنا متعودين عليه لذيذ ودافي للأسف السنة دي هيكون مش كده وهنلاقي طاولة العشاء ناقصة أفراد كنا بنحبهم غابوا عننا بسبب الحرب .. وبدل ما كنا بنسمع أجراس عيد الميلاد بصوت عالي .. السنة دي هنسمع صفارات الإنذار والطلقات النارية والانفجارات. مش كده وبس .. ده قالهم إن أوكرانيا قاومت روسيا لمدة 300 يوم لغاية دلوقتي بشجاعة كبيرة .. وإحنا دلوقتي معانا أسلحة فعالة وقوية .. هنقدر نقاوم بيها روسيا أكتر الفترة الجاية .. وهنصنع المعجزة بإيدينا مش بإيد حد تاني.

عرض المزيد