اشتعال الاجواء بين امريكا من ناحية و التحالف الروسي الصيني في تايوان

ديسمبر 31, 2022


اشتعال الأجواء في تايوان بشكل خطير .. مناورات عسكرية صينية روسية تتعدى الخط المحرم وسط ترقب امريكي .. وأمريكا تقر قانون الدفاع الجديد بأكبر ميزانية في التاريخ .. غضب صيني من زيادة الدعم العسكري لتايوان

اشتعال الأجواء في تايوان

الأجواء الأيام دي مشتعلة جدا في جزيرة تايوان بسبب المناورات العسكرية الصينية الروسية اللي شغالة هناك دلوقتي .. لو تفتكروا كنا اتكلمنا قبل كده كتير عن موضوع تايوان ده ومطالبة الصين بعودتها إليها مرة تانية .. ومحاولات ضمها بالقوة العسكرية .. وإن ده هيكون جزء من صراع أمريكي صيني منتظر السنين الجاية .. وبالفعل بدأت مناوشات الصراع ده من دلوقتي .. طب إيه اللي حصل ؟ الصين وروسيا كانوا أعلنوا من كام يوم عن إجراء مناورات عسكرية وبحرية في بحر الصين الشرقي .. ووزارة الدفاع الروسية قالت إن مجموعة من سفن أسطول المحيط الهادئ اتحركت من مدينة فلاديفوستوك للمشاركة في المناورات دي واللي أطلقوا عليها اسم “التفاعل البحري”.الدولتين قالوا إنه المفروض خلال المناورات دي هيتم إطلاق صواريخ ومدفعية مشتركة على أهداف جوية وإطلاق نيران مدفعية على أهداف بحرية .. بالإضافة لممارسة عمليات مشتركة ضد الغواصات بالاستخدام العملي للأسلحة .. يعني كأنها مشروع حرب حقيقية.
طب إيه الهدف من المناورات دي .. الصين وروسيا بيقولوا إنهم عاوزين يعززوا التعاون العسكري البحري بينهم وبين بعض .. ويحافظوا على السلام والاستقرار في منطقة آسيا والمحيط الهادئ. كمان روسيا رايحة المناورات دي بتقلها .. وهتكون أبرز الأسلحة الروسية فيها السفينة الرئيسية لأسطول المحيط الهادئ الروسي .. اللي هى طراد الصواريخ “فارياغ” وفرقاطة “مرشال شابوشنيكوف” وطرادان “بطل روسيا ألدار تسيدينجابوف” و”سوفيرشيني” .. أما الصين فهتشارك بمدمرات وسفن إمداد متكاملة وغواصات وأسلحة تانية كتير. وخلال المناورات دي اشتعلت الجواء في تايوان .. لدرجة إن وزارة الدفاع التايوانية قالت إن 43 طيارة صينية عبرت خط المنتصف بمضيق تايوان خلال الـ 24 ساعة اللي فاتوا وده خط اسمه “الخط المحرم” مكنش ينفع تعديه الطيارات لأنه منطقة عازلة .. وعلشان كده تايوان خايفة جدا لتكون الحركة دي بداية لخطوات تانية أصعب جاية في الطريق.

مش بس كده .. ده كمان تم رصد 7 سفن تابعة للبحرية الصينية في مكان قريب جدا من الجزيرة .. وعلشان كده تايوان بعتت طيرات مقاتلة لإبعادها هى والطيارات الصينية. على الناحية التانية بقى .. الصين بتقولك إن المناورات اللي انا بعملها دي جاية ردا على استفزازات تايوان والولايات المتحدة ليها. في السياق ده .. صحيفة South China Morning Post أكدت إن المناورات الروسية الصينية دي رسالة إلى تايوان واليابان .. بعد ما أعلنوا الأسبوع اللي فات عن استراتيجية أمنية جديدة .. وقالت إن المناورات دي بتحصل في منطقة على بعد 350 كيلو بس من مضيق تايوان .. ودي تعتبر أقرب مسافة من المضيق ممكن يحصل فيها مناورات بحرية. طبعا زي ما انتوا عارفين إن تايوان بقالها سنين بتشتكي من العمليات العسكرية اللي بتقوم بيها القوات الجوية الصينية بشكل متكرر على مدار السنتين اللي فاتوا بالذات .. لأن الصين بتقول إن تايوان دي جزء من الأراضي بتاعتي رغم إنها بتتمتع بحكم ذاتي .. وعلشان كده حكومة تايوان بترفض المزاعم الصينية دي .. وبتقول إنها عاوزة تعمل اتفاق سلام مع الصين .. لكن في نفس الوقت لو اضطرت للهجوم هتدافع عن نفسها. ولو تفتكروا في شهر أغسطس اللي فات .. الجيش الصيني عمل مناورات عسكرية كبيرة علشان يرد على زيارة رئيسة مجلس النواب الأميركي نانسي بيلوسي لتايوان .. لأن بكين بتشوف إن زيارات الحكومات الأجنبية للجزيرة اعتراف فعلي بالجزيرة باعتبارها مستقلة .. وده تحدي لمطالبة الصين بالسيادة عليها.

في الوقت اللي بتعمل فيه الصين وروسيا مناورات في بحر الصين الشرقي وبتعدي الطيارات بتاعتهم الخط المحرم .. بنلاقي مجلس الشيوخ الأمريكي بيوافق على قانون ميزانية الدفاع بتاع سنة 2023 .. واللي بتعتبر أكبر ميزانية في تاريخ الولايات المتحدة بحوالي 858 مليار دولار .. بزيادة 45 مليار دولار عن الميزانية اللي اقترحها الرئيس الأميركي جو بايدن. طب إيه أهمية القانون ده ؟ .. القانون ده بيحدد سياسة وزارة الدفاع الأمريكية طول السنة الجديد .. وبيقولك النظام هيمشي إزاي طول السنة دي .. كمان بيسمح بتخصيص 858 مليار دولار للإنفاق العسكري .. وهيتضمن زيادة بنسبة 4.6% لرواتب الجنود .. وتمويل مشتريات أسلحة وسفن وطائرات .. ودعم تايوان وأوكرانيا .. وهنا بقى مكمن الخطورة .. ليه .. لأن زيادة تمويل تايوان وأوكرانيا معناه زيادة التوتر والصراع مع الصين من ناحية وروسيا من ناحية تانية .. يعني السنة الجاية الدنيا مش هتهدأ زي ما كنا بنتمنى. وعلشان كده الصين أول ما تمت الموافقة على القانون ده .. طلعت بيان رفضت فيه بشدة الكلام اللي موجود فيه عن دعم تايوان .. ووزارة الخارجية الصينية أعلنت معارضتها التامة للقانون .. وقالت إنه استفزاز سياسي خطير من أمريكا لينا .. وتدخل صارخ في الشؤون الداخلية للصين

عرض المزيد